На вайне ва Украіне гінуць найміты з Цэнтральнай Азіі

• 25.06.2025, 12:13

Крэмль займаецца прымусовай вярбоўкай.

Тысячы мігрантаў з Цэнтральнай Азіі апынуліся ўцягнутымі ў вайну ва Украіне не са сваёй волі. Паводле звестак украінскага праекта “Хачу жыць", больш за 3 тысячы грамадзян Узбекістана, Таджыкістана, Кыргызстана і Туркменістана ваююць у шэрагах расейскага войска. Многія з іх - былыя дворнікі, будаўнікі, нелегальныя мігранты, завербаваныя пад пагрозамі або фальшывымі абяцаннямі, піша Atlantic Council (пераклад — сайт Charter97.org).

Асаблівую ўвагу прыцягвае міграцыйны цэнтр у Сахараве - там займаюцца прымусовай вярбоўкай. Пасля прыняцця закона аб атрыманні грамадзянства РФ у абмен на вайсковую службу, улады Масквы пачалі актыўную кампанію набору мігрантаў. Таксама да вярбоўкі датычная ПВК “Вагнер", якая актыўна залучала зняволеных і замежнікаў.

Лічбы здзіўляюць: з 1110 узбекаў, якія ўступілі ў войска, загінулі 109; з 931 таджыка — 196; з 360 кіргізаў — 38; з 170 туркменаў — 27. Ім абяцалі да $4000 на месяц і грамадзянства, але напраўду яны атрымлівалі мізэрныя сумы — і квіток у адзін канец.

Многія цэнтральнаазіяцкія дзяржавы афіцыйна забараняюць сваім грамадзянам удзельнічаць у вайне, але рэальныя меры робяцца рэдка. Экспэрты адзначаюць, што ўразлівасць мігрантаў - галоўная зброя Крамля: яны пазбаўленыя правоў, і адмаўляцца ад службы небяспечна.

Гэтая вайна раскрывае глыбінны крызіс маралі: калі грамадзянства прадаецца за жыццё, а адчай выкарыстоўваецца як стратэгія. Цэнтральнаазіяцкія мігранты становяцца "нябачнымі салдатамі" чужой вайны - і гінуць без імя, права і выбару.