У афрыканскага сябра Лукашэнкі ўспыхнулі пратэсты
- 26.06.2025, 9:15
Дайшло да маштабных сутыкненняў з паліцыяй.
Шаснаццаць чалавек загінулі падчас агульнанацыянальных антыўрадавых пратэстаў у Кеніі ў сераду, большасць з іх былі забітыя паліцыяй, заявіў кіраўнік Amnesty Kenya Ірунгу Хоўтан. Усё адбылося праз год пасля крывавых дэманстрацый супраць падатковага законапраекта, якія скончыліся штурмам парламента, піша Reuters.
Паводле інфармацыі мясцовых СМІ і відавочцаў Reuters, тысячы кенійцаў выйшлі на вуліцы 25 чэрвеня, каб ушанаваць памяць ахвяр леташніх дэманстрацый, падчас якіх загінула больш за 60 чалавек. Для іх разгону ў сталіцы краіны Найробі паліцыя ўжыла слезацечны газ і вадамёты.
Кіраўнік Amnesty Kenya Ірунгу Хоўтан паведаміў Reuters, што некаторыя пратэстоўцы сутыкнуліся з паліцыяй, і ўжо пацверджана, што 16 чалавек загінулі. Ён дадаў, што гэтыя звесткі былі правераныя Сусветнай арганізацыяй у назіранні за выкананнем правоў чалавека і Нацыянальнай камісіяй Кеніі ў правах чалавека (KNCHR).
«Большасць з іх былі забітыя паліцыяй», – сказаў Хоутон, дадаўшы, што, прынамсі, пяць ахвяр былі застрэленыя.
Раней фінансаваная ўрадам KNCHR паведаміла, што па ўсёй краіне зарэгістравана восем смерцяў, усе - «меркавана ад агнястрэльных раненняў».
«Паведамляецца аб больш чым 400 ахвярах, сярод якіх дэманстранты, супрацоўнікі паліцыі і журналісты», – гаворыцца ў заяве KNCHR, апублікаванай у афіцыйным акаўнце X.
Наглядны орган адзначыў актыўны ўдзел паліцыі і «заявы аб празмерным выкарыстанні сілы, уключаючы гумовыя кулі, баявыя патроны і вадамёты, што прывяло да шматлікіх траўм».
Прадстаўнік кенійскай паліцыі Мучыры Ньяга адмовіўся каментаваць заявы Amnesty Kenya ці KNCHR.
Фінансаваная дзяржавай арганізацыя «Незалежны орган нагляду за дзейнасцю паліцыі» (IPOA) заявіла, што падчас пратэстаў быў арыштаваны не менш за 61 чалавек.
Нацыянальны пастаўшчык электраэнэргіі Kenya Power паведаміў, што адзін з яго ахоўнікаў быў застрэлены падчас патрулявання ля офіса кампаніі ў Найробі.
Раней у кадрах, якія трансляваліся кенійскім каналам NTV, былі заўважаныя вялікія натоўпы, якія накіроўваліся ў бок рэзідэнцыі прэзідэнта, перш чым гэты канал і іншы вяшчальнік KTN былі адключаныя ад эфіру за парушэнне загада спыніць жывую трансляцыю дэманстрацый.
Абодва каналы аднавілі вяшчанне пазней у сераду пасля таго, як суд у Найробі прыпыніў дзеянне пастановы, выдадзенай Управай па камунікацыях Кеніі.
Сутыкненні з паліцыяй
Паводле інфармацыі NTV, асобныя сутыкненні адбыліся ў партовым горадзе Мамбасе, пратэсты таксама прайшлі ў гарадах Кітэнгела, Кісіі, Матуу і Ньеры.
Хаця леташнія пратэсты сціхлі пасля таго, як прэзідэнт Уільям Рута адклікаў прапанаванае падвышэнне падаткаў, захавалася грамадская незадаволенасць праз празмернае выкарыстанне сілы службамі бяспекі. Акрамя таго, зараз, у чэрвені, пасля затрымання паліцыяй памёр блогер.
Кровапраліцце ў Кеніі. Прэзідэнт адклікаў закон аб падатках і паабяцаў пачаць агульнанацыянальны дыялог
Шэсць чалавек, у тым ліку тры паліцыянты, былі абвінавачаныя ў забойстве ў аўторак у сувязі з забойствам 31-гадовага блогера і настаўніка Альберта Айванга. Усе яны не прызналі сябе вінаватымі.
Смерць Айванга стала падставай для пратэстаў для кенійцаў, якія ўсё яшчэ аплакваюць загінулых на леташніх дэманстрацыях, віну яны ўскладаюць на сілы бяспекі. Усё гэта адбываецца на фоне дзясяткаў невытлумачальных знікненняў людзей.
«Мы змагаемся за правы нашых суайчыннікаў, кенійцаў і людзей, якія загінулі з 25 чэрвеня...мы хочам справядлівасці», – заявіў агенцтву Reuters у Найробі пратэстовец Лумумба Хармані.
Нагадаем, Уільям Рута стаў прэзідэнтам Кеніі ў 2022 годзе. Пры гэтым у 2010—2016 гадах Міжнародны крымінальны суд у Гаазе расследаваў справу аб гвалце падчас прэзідэнцкіх выбараў 2007, дзе палітык быў абвінавачаным — яшчэ як міністр адукацыі, навукі і тэхналогій гэтай краіны.
У снежні 2023 года з Рута сустракаўся Аляксандр Лукашэнка - спачатку ў Дубаі, а потым і ў Найробі. Палітыкі пастанавілі «інтэнсіфікаваць двухбаковыя дачыненні». Лукашэнка неаднаразова запрашаў Рута ў Беларусь.