BE RU EN

У Беларусі забаранілі збіраць некалькі відаў ядомых грыбоў

  • 27.06.2025, 8:42

Адзін з іх каштуе блізу 120 еўраў за кілаграм.

Нядаўна была адрэдагаваная Чырвоная кніга. Цяпер жа Інстытут эксперыментальнай батанікі ім. Купрэвіча пры Нацыянальнай акадэміі навук (НАН) Беларусі апублікаваў тлумачэнні да змен спісу рэдкіх і ахоўных відаў. Там ёсць і ядомыя грыбы - іх больш нельга збіраць пад пагрозай штрафу.

Усяго сем відаў грыбоў «прапанаваныя да аховы ў сувязі са значным скарачэннем раней вядомых месцаў вырастання»:

Сыраежка залацістая

Павуціннік залаціста-руды (Cortinarius aureofulvus Moser);

Вароначнік ражковападобны (Craterellus cornucopioides L. Pers.;

Каштанавы грыб, каштанавік (Gyroporus castaneus (Bull.) Quél.);

Сыраежка залацістая (Russula aurea Pers.);

Сыраежка сардоніксавая (Russula sardoniа Fr.);

Вальварыэла шаўкавістая (Volvariella bombicina (Schaeff.) Singer);

Ксілабалюс панцырны (Xylobolus frustulatus (Pers.) P. Karst.).

Як піша «Смартпресс», як мінімум тры віды грыбоў са спісу з'яўляюцца ядомымі - каштанавік, вальварыэла шаўкавістая і чорная лісічка (вароначнік ражковападобны). Адзначым, што сыраежка залацістая ў літаратуры таксама пазначаецца як ядомая.

Каштанавы грыб мае падабенства з белым грыбам, але ножка мае карычняваты колер і полая або з пустэчамі.

Каштанавы грыб, каштанавік

Вальварыела сустракаецца летам і ўвосень у лісцяных і змешаных лясах, парках - на жывых і адмерлых ствалах лісцяных дрэў. Спачатку яна хаваецца ў «яйку», затым распускаецца.

Вальварыела шаўкавістая

Чорная лісічка, або вароначнік ражковападобны (Craterellus cornucopioides), па смаку не саступае сваім жоўтым субратам. Расце на глебе ў вільготных лісцяных, іглічных і змешаных лясах, у тым ліку на апалай лістоце дубоў і букаў, на гліністай і вапнавай глебе, аддае перавагу адкрытым, светлым месцам, абочынам сцяжынак і дарог, краю канаў.

Вароначнік ражковападобны

Дарэчы, два гады таму чорныя лісічкі знайшлі ў гідралагічным заказніку «Рычы» ў Браслаўскім раёне.

Згодна з фінскім кіраўніцтвам па выкарыстанні грыбоў, гэты ядомы грыб не патрабуе папярэдняй апрацоўкі. Выкарыстоўваецца ў смажаных, тушаных стравах, супах, падліўках, заправах. Прычым ён дастаткова дарагі - амаль 120 еўраў за кілаграм.

Як адзначаецца ў тлумачэннях навукоўцаў, сем відаў грыбоў, уключаныя ў Чырвоную кнігу, з'яўляюцца «індыкатарамі малапарушаных і векавых лясоў».

Пры гэтым дзевяць грыбоў выключылі з Чырвонай кнігі праз тое, што іх ужо даўно не знаходзілі ў Беларусі.

Апошнія навіны