У Арменіі сілавікі прыйшлі ў рэзідэнцыю каталікоса

• 27.06.2025, 12:36

Пачаліся сутыкненні.

Супрацоўнікі Службы нацыянальнай бяспекі (СНБ) Арменіі прыйшлі ў рэзідэнцыю кіраўніка Армянскай апостальскай царквы (ААЦ) манастыр Эчміядзін, размешчаны пад Ерэванам. Як паведамляе News.am, сілавікі, у тым ліку ў балаклавах, з'явіліся ў Эчміядзін, калі там праходзіў сход святароў. Карэспандэнт выдання паведамляе, што дарожная паліцыя абмежавала рух у наваколлях кляштарнага комплексу дзеля бесперашкоднага праезду машын СНБ.

Агенцтва «Навіны — Арменія» паведамляе, што супрацоўнікі СНБ збіраюцца затрымаць кіраўніка Шыракскай епархіі архіепіскапа Мікаэла Аджапахяна. «Я ніколі не хаваўся і зараз не збіраюся хавацца. Тое, што адбываецца, - беззаконне. Прыйшлі па мяне, я пайду, і заяўляю, што гэта - беззаконне. Я ніколі не быў і не з'яўляюся пагрозай гэтай краіне, асноўная пагроза сядзіць ва ўрадзе», - заявіў журналістам Аджапахян.

На месцы знаходзіцца каталікос Гарэгін II, прадстаўнікі духавенства і вернікі, яны спрабуюць перашкодзіць затрыманню Аджапахяна. Мяркуючы па кадрах з месца, абстаноўка напружаная, даходзіць да фізічных сутыкненняў. Людзі ў натоўпе крычаць сілавікам: «Ганьба вам».

«Дарагія, усё духавенства Арменіі гатовае да арышту: мы ўсе ў Першапрастольным [Эчміядзіне]. Прыйшлі ў Першапрастольны — са Святога Эчміядзіна вы забераце альбо ўсіх нас, альбо наш труп», — заявіў дырэктар музеяў і архіваў Першапрастольнага Святога Эчміядзіна іерэй Асохік Карапецян.