Майстар-клас ў цынічнасці ад Лукашэнкі
- 27.06.2025, 16:30
Дыктатар бароніць іранскі рэжым.
Праз некалькі дзён пасля спынення абстрэлаў паміж Іранам і Ізраілем Аляксандр Лукашэнка вырашыў асудзіць атаку на іранскія ядзерныя аб'екты. "Салідарнасць" тлумачыць, чым цынічныя гэтыя заявы.
Як раней адзначалі палітычныя аглядальнікі, кіраўнік Беларусі яўна вытрымліваў паўзу ў чаканні візіту ў Менск спецпрадстаўніка прэзідэнта ЗША Кіта Келлага, не жадаючы сарваць яго праіранскімі заявамі.
Але яго свежыя выказванні адметныя ў першую чаргу іх зместам, а не вымушанай адтэрміноўкай або абставінамі, у якіх яны прагучалі — падчас паседжання вышэйшай дзяржрады ЕАЭС.
«Нядаўнія ўдары па ядзерных аб'ектах Ірана, якія знаходзяцца пад кантролем МАГАТЭ, самым небяспечным чынам парушаюць палажэнні міжнароднага права, у тым ліку Дамову аб нераспаўсюджанні ядзернай зброі і Жэнеўскія канвенцыі 1949 года. Не буду нават казаць пра пачуцці, якія такія дзеянні выклікаюць у Беларусі, краіне, якая найбольш пацярпела ад аварыі на Чарнобыльскай атамнай станцыі», - сказаў Лукашэнка.
І гэта самы сапраўдны майстар-клас ў цынічнасці выказванняў і падвойных стандартах. Тлумачым па пунктах.
Менавіта Лукашэнка ініцыяваў і прыклаў усе намаганні для будаўніцтва ў Беларусі атамнай станцыі расейскага ўзору — насуперак грамадскай і экспертнай думцы.
24 лютага 2022-га, у першыя дні поўнамаштабнага ўварвання, расейскія акупацыйныя войскі зайшлі з тэрыторыі Беларусі ў зону адчужэння і часова захапілі Чарнобыльскую АЭС. Беларусаў, якія выступілі супраць вайны, хапалі па ўсёй краіне.
У лютым гэтага года расейскі беспілотнік пашкодзіў дах саркафага над разбураным энэргаблокам, што выклікала працяглы пажар. Украінская Прыпяць, мякка кажучы, куды бліжэй да Беларусі, чым іранскі Форда, але нешта мы не чулі ад Лукашэнкі асуджэнняў лютаўскай атакі.
Не было пярэчанняў з боку кіраўніка і наконт захопу расейскімі акупантамі найбуйнейшай атамнай станцыі Еўропы ў Запарожжы. А калі там па якой-небудзь прычыне ірване, то гарантавана дастанецца і беларусам.
Кіраўнік Беларусі ганарыцца тым, што нібыта дабіўся размяшчэння ў нас расейскай тактычнай зброі, фактычна намаляваўшы на карце краіны тоўстую цэлю. І дзе ж яго клопат пра пачуцці народа, які найбольш пацярпеў ад найбуйнейшай ядзернай катастрофы?
Асуджаючы чужыя атакі на ядзерныя аб'екты, Лукашэнка не заўважае ва ўласным воку бярвёны памерам з атамны грыб.