У Вільні адбыўся мітынг з удзелам Сяргея Ціханоўскага

• 28.06.2025, 20:25

На акцыю прыйшло амаль 200 чалавек.

У суботу, 28 чэрвеня, у Вільні на плошчы Вінцаса Кудзіркі прайшоў мітынг з удзелам былога палітвязня Сяргея Ціханоўскага. На акцыю прыйшло амаль 200 чалавек, паведамляе «Белсат».

Удзельнікі праспявалі "Муры". Сяргей Ціханоўскі зачытаў свой верш, напісаны за кратамі, а таксама выказаўся аб сваім вызваленні.

«Выпусціўшы мяне, Лукашэнка кінуў усіх пракурораў. Яны ўсе атрымалі зоркі. Ім усім давядзецца адказваць», – сказаў былы палітвязень.

Ціханоўскі таксама згадаў палітвязня, аднаго з лідараў апазіцыі Мікалая Статкевіча, распавёў, у якіх страшных умовах яго ўтрымлівалі - у камеры, дзе няма магчымасці нават локці развесці. Статкевічу, са слоў Ціханоўскага, прапаноўвалі пісаць прашэнне аб памілаванні, але ён адмовіўся.

Сярод удзельнікаў акцыі была былая палітзняволеная, актывістка грамадзянскай кампаніі «Еўрапейская Беларусь» Паліна Шарэнда-Панасюк.

Сяргей Ціханоўскі заявіў, што будзе дабівацца сустрэчы з прэзідэнтам Украіны Уладзімірам Зяленскім.

Былы палітвязень адзначыў, што працягвае страчваць вагу - пасля выхаду з турмы блогер важыў 79 кг, а цяпер - 76.