У Беларусь спрабавалі завезці сотню кілаграмаў гашышу

• 29.06.2025, 13:06

Спрабавалі замаскаваць пад грушавае пюрэ.

Мытнікі спынілі ўвоз у Беларусь з Еўразвяза амаль 100 кг гашышу. У перамяшчэнні наркотыкаў былі задзейнічаныя літоўцы і беларусы, паведамляе Дзяржаўны мытны камітэт.

У пункт пропуску «Каменны Лог» для афармлення прыбыў грузавік літоўскага перавозчыка з таварам «канцэнтраванае пюрэ». Аднак пры аглядзе аўто мытнікі знайшлі буйную партыю гашышу. 180 вакуумных упаковак з наркотыкам былі схаваныя ў пустой прасторы пад падлогай грузавіка.

Як паведамляе Мытны камітэт, арганізатарамі злачыннай групы выявіліся літоўцы. Таксама затрыманыя беларусы: яны ўзятыя пад варту.

«Гарадзенскай рэгіянальнай мытняй распачатая крымінальная справа паводле прыкмет злачынства, прадугледжанага ч.2 арт.328-1 КК Рэспублікі Беларусь. Санкцыя артыкула прадугледжвае пазбаўленне волі на тэрмін да 10 гадоў», - сказана ў паведамленні ведамства.