СМІ: У Расеі сілавікі да смерці збілі двух азербайджанцаў

• 30.06.2025, 16:28

Азербайджан патрабуе прыцягнуць вінаватых да адказнасці.

У Азербайджане правядуць паўторную экспертызу збітых расейскімі сілавікамі да смерці братоў Зіядзіна і Гусейна Сафаравых.

Пра паўторную экспертызу паведаміў брат загінулых, намеснік галоўнага рэдактара "525-ci qəzet" Сейфедзін Гусейнаў, перадае report.az.

"Экспертыза адбудзецца або сёння, або заўтра - дакладная дата пакуль не вызначаная", - адзначыў ён.

Масавыя затрыманні азербайджанцаў у Екацярынбурзе прайшлі 27 чэрвеня. Усяго ў аддзел паліцыі былі дастаўленыя больш за 50 чалавек, пісаў Е1.

МЗС Азербайджана заявіла, што сярод затрыманых ёсць загінулыя і параненыя, і папрасіла прыцягнуць да адказнасці тых, хто мае дачыненне да гвалту падчас следчых дзеянняў. У расейскім МЗС растлумачылі, што затрыманні праводзіліся ў межах расследавання крымінальных спраў паводле факта "цяжкіх злачынстваў". Запрошаны 28 чэрвеня ў МЗС Азербайджана часова павераны ў справах Расеі Пётр Валаковых запэўніў, што сітуацыя знаходзіцца пад кантролем праваахоўных органаў.

Мінкультуры Азербайджана пасля затрыманняў азербайджанцаў і незаконных, на думку Баку, дзеянняў расейскіх сілавікоў аб'явіла пра адмену ўсіх культурных мерапрыемстваў, запланаваных сумесна з Масквой. З гэтай жа прычыны азербайджанская дэлегацыя вырашыла не ўдзельнічаць у пасяджэнні камісіі парламента рэспублікі і Федэральнага сходу Расеі міжпарламенцкім супрацоўніцтве.