Пачалася новая сварка паміж Трампам і Маскам

• 1.07.2025, 8:40

Прэзідэнт ЗША прапанаваў мільярдэру "прыкрыць лавачку" і "вярнуцца ў ПАР".

Прэзідэнт ЗША Дональд Трамп параіў амерыканскаму прадпрымальніку Ілану Маску "вярнуцца дадому ў ПАР" на фоне крытыкі бізнэсоўцам законапраекта кіраўніка дзяржавы аб падатках. Пра гэта амерыканскі лідар заявіў у сацсетцы Truth Social.

"Ілан, магчыма, атрымлівае больш субсідый, чым хто-небудзь у гісторыі, з вялікім адрывам, і без гэтых субсідый яму, імаверна, давялося б згарнуць бізнэс і вярнуцца дадому ў Паўднёвую Афрыку", - адзначыў ён.

Маск у адказ на гэты допіс напісаў: "Я даслоўна кажу - скараці ўсё. Прама зараз".

Пры гэтым 29 чэрвеня Трамп заявіў у інтэрв'ю Fox News, што добра ставіцца да Маска, нягледзячы на канфлікт.

Ён дадаў, што "разумны хлопец" Маск праводзіў з ім выбарчую кампанію, але быў "крыху засмучаны". Па меркаванні лідара, гэта было недарэчна. Трамп звязаў незадаволенасць прадпрымальніка з тым, што ўлады не садзейнічалі распаўсюджванню ў ЗША аўтамабіляў з электрарухавіком, якія выпускае кампанія Маска Tesla.