Восем палітычных партый Грузіі абвясцілі байкот выбарам

• 1.07.2025, 9:53

Апазіцыя выступала з заявай.

Восем палітычных партыяў Грузіі адмовіліся ўдзельнічаць у выбарах у органы мясцовага самакіравання. На думку прадстаўнікоў партыяў, мясцовыя выбары з'яўляюцца легітымізацыяй незаконнага рэжыму.

Байкот абвясцілі «Плошча Свабоды», «Еўрапейская Грузія», «Адзіны нацыянальны рух», «Стратэгія Агмашэнебелі», «Ахалі», «Гірчы — больш свабоды», «Дроа» і «Федэралісты». Агульная заява партый гучыць так:

«Мы, празаходнія палітычныя партыі і групы Грузіі, мэтай якіх з'яўляецца поўны дэмантаж расейскага рэжыму Іванішвілі, абарона незалежнасці і суверэнітэту Грузіі, устанаўленне дэмакратычнага кіравання еўрапейскага ўзору, стварэнне бяспечнага асяроддзя і магчымасці для дастойнага жыцця для нашых грамадзян, а таксама ўступленне нашай краіны ў Еўрапейскі звяз і NATO, сумесна заяўляем:

Мы адмаўляемся ўдзельнічаць у так званых выбарах у органы мясцовага самакіравання, бо лічым, што ў цяперашніх рэаліях удзел у гэтым працэсе не будзе служыць інтарэсам нашых грамадзян, а толькі створыць бачнасць легітымнасці незаконнага расейскага рэжыму.

Мы ўсведамляем неабходнасць сумесных дзеянняў і заяўляем, што зробім усё магчымае, каб паскорыць канец недэмакратычнай, алігархічнай сістэмы нашай прынцыповай, бескампраміснай барацьбой і працай. Мы лічым, што шлях да перамогі ляжыць у поўным несупрацоўніцтве з рэжымам. Разам з грамадзянамі Грузіі мы працягваем агульны нацыянальны супраціў. Да канца».

У траўні 2024 года ў Грузіі пачаліся масавыя пратэсты праз закон аб замежных агентах. Кіруючая партыя "Грузінская мара» абвінаваціла Захад у «фінансаванні рэвалюцыйнага сцэнара ў Грузіі»

Увосень, пасля перамогі «Грузінскай мары» на парламенцкіх выбарах, пратэсты працягнуліся, паколькі апазіцыя палічыла вынікі выбараў сфальсіфікаванымі.