Украіна нанесла трайны ўдар па аб'ектах ФСБ

• 10.07.2025, 19:21

Будынкі абрынуліся.

Украінскія сілы падчас скаардынаванай атакі раніцай 8 ліпеня знішчылі тры будынкі, якія выкарыстоўваліся расейскай ФСБ. Паводле звестак Telegram-канала «Досье Шпиона», блізкага да расейскіх спецслужбаў, атака пачалася раніцай і доўжылася амаль 10 хвілін. Задзейнічалі сем ударных беспілотнікаў тыпу "крыло".

Аб'екты ў Сватаве (вул. Савецкая), Белаводску (вул. Леніна) і Старабельску (вул. Валадарскага) практычна адначасова падвергліся ўдарам, што, верагодна, дазволіла мінімізаваць рэакцыю і арганізаваную абарону.

Паводле апублікаванай інфармацыі, усе тры будынкі цалкам знішчаныя. На здымках відаць, што пабудовы абрынуліся, а прылеглая тэрыторыя ўсеяная адломкамі.

У Белаводску пацярпелі два супрацоўнікі. Лёс яшчэ двух чалавек, якія знаходзіліся ў будынку, застаецца невядомым.

Характар пашкоджанняў будынкаў дазваляе сцвярджаць, што ўсе, хто знаходзіліся ў момант удару ўнутры, загінулі.

Гэтая аперацыя дэманструе здольнасць Украіны наносіць дакладныя і сінхронныя ўдары па ключавых аб'ектах расейскіх спецслужбаў нават у глыбіні акупаванай тэрыторыі. Каардынацыя налёту з выкарыстаннем некалькіх БПЛА і разбурэнне інфраструктуры ФСБ могуць істотна ўскладніць працу расейскіх сіл бяспекі ў рэгіёне.