Комба ад УСУ: за ноч украінскія БПЛА атакавалі адразу чатыры вайсковыя заводы РФ у Тульскай вобласці
- 11.07.2025, 16:41
Прадпрыемствы звязаныя з вытворчасцю боепрыпасаў і зброі.
Адразу некалькі прадпрыемстваў абароннай прамысловасці Тульскай вобласці аказаліся пад ударам у ноч на 11 ліпеня. Серыя атак беспілотнікаў закранула як саму Тулу, так і найбліжэйшыя гарады, паведаміў расейскі тэлеграм-канал ASTRA.
Паводле папярэдняй інфармацыі, удары мелі прыцэльны характар — пацярпелі аб'екты, цесна звязаныя з расейскай абароннай замовай і вытворчасцю боепрыпасаў.
Адзін з інцыдэнтаў адбыўся ў горадзе Алексіне. Там абломкі збітага дрона ўпалі на тэрыторыю чацвёртага цэха Алексінскага доследнага механічнага завода. Звестак аб пашкоджаннях або пацярпелых няма.
Гэты завод уваходзіць у структуру канцэрна «Тэхмаш2» і займаецца вытворчасцю абсталявання для вырабу выбуховых рэчываў і цвёрдага ракетнага паліва, піша dialog.ua.
Другі эпізод зафіксаваны ў Новамаскоўску. Паводле інфармацыі крыніц, як мінімум адзін беспілотнік трапіў па тэрыторыі хімічнага прадпрыемства «Азот». Пацярпеў ахоўнік прадпрыемства — 57-гадовы Сяргей Гаўрушкін. З аскепкавымі раненнямі яго даставілі ў гарадскую клінічную лякарню.
Завод «Азот» пастаўляе азотную кіслату на прадпрыемства імя Свярдлова, дзе вырабляюць кампаненты для артылерыйскіх боепрыпасаў. Гэта ўжо не першая атака на хімкамбінат: удары фіксаваліся ў траўні і чэрвені.
У самой Туле быў атакаваны адзін з ключавых аб'ектаў расейскай «абаронкі» - канструктарскае бюро прыборабудавання імя акадэміка Шыпунова. Прадпрыемства займаецца стварэннем высокадакладнага ўзбраення. У выніку першага ўдару загарэўся адміністрацыйны будынак, затым завод быў атакаваны паўторна. Адзін супрацоўнік загінуў, яшчэ адзін атрымаў раненні.
Гэта не першая атака на КБП, раней БПЛА ўжо дасягалі яго тэрыторыі ў чэрвені.
Акрамя таго, цэлі былі заўважаныя і над тэрыторыяй НВА «Сплаў» - прадпрыемства, якое спецыялізуецца на рэактыўных сістэмах залпавага агню. На гэты раз невядома, ці была прычыненая шкода. Аднак раней аб'ект ужо зазнаваў атакі: у траўні адзін з дзейных цэхаў быў пашкоджаны, а 7-га чысла таго ж месяца завод зноў апынуўся пад агнём.
Усе чатыры атакаваныя аб'екты наўпрост звязаныя з вытворчасцю ўзбраення і фактычна ўдзельнічаюць у агрэсіі супраць Украіны. Крыніцы ў сілавых структурах Украіны не каментуюць датычнасць да інцыдэнтаў, аднак у апошнія месяцы такія атакі сталі рэгулярнымі і дэманструюць новы ўзровень глыбіні і дакладнасці ўдараў па тылавой інфраструктуры ў Расеі.