Колькі грошай з кішэняў беларусаў выдаткавалі на «Славянскі базар»?
- 12.07.2025, 12:09
Не абышлося без кампаній-«карусельнікаў».
У Віцебску праходзіць міжнародны фестываль мастацтваў «Славянскі базар». Мясцовыя чыноўнікі заяўляюць аб ягонай «камерцыйнай паспяховасці». Журналісты «Зеркала» паглядзелі, колькі выдаткоўваюць грошай на арганізацыю фэсту з бюджэту і якія ганарары плацяць артыстам.
Колькі выдаткавалі на арганізацыю пляцовак
151 тысяча рублёў пойдзе кампаніі «Блэкаўт студыі» за асвятляльнае абсталяванне ў Летні амфітэатр. Яна ж забяспечыць аналагічную паслугу для канцэртнай залы «Віцебск» за амаль 62 тысячы. Амаль 252 тысячы рублёў гэтай кампаніі заплацяць за абслугоўванне святлодыёдных экранаў, сістэмы падвесу і механікі сцэны. Паводле двух першых артыкулаў выдаткаў усе грошы будуць бюджэтныя, у трэцім - часткова з «ўласных сродкаў».
Нагадаем, кампанія «Блэкаўт студыё» раней фігуравала ў крымінальнай справе за хабар, якую распачыналі на былога дырэктара «Менскканцэрта». Дарэчы, гэтая фірма - нярэдкі ўдзельнік і пераможца закупаў на дзяржаўныя мерапрыемствы.
«Саўндкафэ прадакшн» атрымае амаль 97 тысяч за дадатковае гукавое абсталяванне для канцэртных пляцовак.
Спецэфектамі занялася «ПайраГруп Тэхналаджы», якая атрымае за гэта амаль 59 тысяч. У гэтым і папярэднім выпадку частку сродкаў возьмуць з дзяржказны, а частка будзе «ўласнымі», імаверна, ад нейкіх спонсараў. Дарэчы, гэтая фірма нярэдка перамагае ў тэндэрах, калі гаворка ідзе пра феерверкі на дзяржмерапрыемствы.
«Белімлайт» перадасць святлодыёдныя экраны, сістэму падвесу і механікі сцэны ў Летнім амфітэатры і атрымае за гэта амаль 220 тысяч. Возьмуць іх з бюджэту. Ёй заплацяць за дадатковыя асвятляльныя сістэмы 141,7 тысячы на гэтай жа пляцоўцы. А яшчэ 58,1 тысячы - за аналагічную паслугу ў канцэртнай зале «Віцебск». «Белімлайт» - гэта адна з кампаній, якія рэгулярна выступаюць у якасці пастаўшчыкоў арганізацыйных паслуг для буйных дзяржаўных канцэртаў.
На пералічаныя выдаткі па арганізацыі пляцовак спатрэбілася больш за 1 млн 40 тысяч рублёў.
Колькі заплацяць артыстам
Выступленне на фестывалі Руслана Аляхно каштавацьме бюджэту 10 тысяч рублёў.
Амаль 39 тысяч заплацяць расейскаму прадпрымальніку Алегу Кудраўцаву за арганізацыю выступаў неназваных «зорак эстрады». Магчыма, менавіта ён раней прывозіў у Беларусь гурт «Дыскамафія».
Удзел лукашэнкаўскага аркестра ў рамках «дзён саюзнай дзяржавы» на фестывалі абыдзецца 30,4 тысячы рублёў. Асобна ёсць артыкул выдаткаў на паслугі па арганізацыі выступу гэтага калектыву. На гэта выдаткуюць 86 тысяч рублёў. У абодвух выпадках сродкі пойдуць Палацу Рэспублікі, які ўваходзіць у кіраўніцтва справамі Лукашэнкі. У першым выпадку ўсю суму возьмуць з бюджэту, а ў другім - часткова выдаткуюць уласныя сродкі.
Атрымліваецца, толькі на гэтыя выступленні спатрэбілася 165,4 тысячы рублёў.
Аднак гэта далёка не ўсе марнаванні. На фестываль з'язджаюцца дзясяткі артыстаў і выканаўцаў, аплата ідзе паводле многіх арганізацыйных артыкулаў. Плюс нават самыя сціплыя падлікі па дзяржзакупах указваюць, што сотні тысяч рублёў ідуць на транспарт для выступоўцаў і арганізаваных гледачоў, іх пражыванне і харчаванне.