Еўразвяз папярэдзіў Трампа

• 14.07.2025, 10:51

Брусэль рыхтуе адказ на мыты ЗША.

Еўрапейскі Звяз падрыхтаваў шырокі спіс мытаў супраць ЗША, якія ўвойдуць у дзеянне ў выпадку, калі перамовы з Вашынгтонам не будуць мець поспеху.

Пра гэта расказаў міністр замежных спраў Італіі Антоніё Таяні ў інтэрв'ю Il Messaggero.

"Гатовы спіс еўрапейскіх мытаў на 21 мільярд еўраў, да якога можа быць дададзены другі", - сказаў Таяні, расказваючы аб магчымым адказе на абвешчаныя Дональдам Трампам мыты супраць ЕЗ у суме 30%.

Італьянскі міністр падкрэсліў, што нягледзячы на гатоўнасць да жорсткага адказу, еўрапейскія чыноўнікі не пакідаюць спроб знайсці дыпламатычнае развязанне.

"[Еўропа павінна рэагаваць] спакойна і стрымана. Яна павінна весці перамовы з высока паднятай галавой, ведаючы, што ў інтарэсах усіх пазбегнуць гандлёвай вайны. Еўропе патрэбна Амерыка, і наадварот", - сказаў міністр.

Анансаваныя Трампам мыты павінны ўвайсці у дзеянне ўжо з 1 жніўня, але Таяні выказаў аптымізм наконт магчымасці дасягнення пагаднення.

"У нас ёсць два тыдні ... я ўпэўнены, што будзе прагрэс. Мыты шкодзяць усім, пачынаючы са Злучаных Штатаў. Калі біржы падаюць, пад пагрозай пенсіі і ашчадак амерыканцаў", - сказаў італьянскі міністр.