Непагадзь паралізавала «Магілёўхімвалакно»

• 14.07.2025, 10:48

На аднаўленне электразабеспячэння сыдзе не менш за тыдзень.

Пасля рамонтных і аднаўленчых работ, звязаных са стыхіяй, якая абрынулася, без электраэнэргіі застаецца прадпрыемства “Магілёўхімвалакно”, паведаміў міністр энэргетыкі Дзяніс Мароз.

"Электраэнергія пададзеная ва ўсе населеныя пункты, даведзена да кожнага спажыўца і прамысловага прадпрыемства, — падкрэсліў ён. - Выключэннем стала "Магілёўхімвалакно” - гэта самы цяжкі адцінак, там пашкоджаны тэхналагічны электрапровад".

Са слоў міністра, "паступова працэсы запускаюцца"

"Разам з тым без аднаўлення гэтага энэргапроваду паўнавартасны выхад на рэжым працы завода абцяжараны, — сказаў ён. - Цяпер працуе інжынерны персанал, праектанты, будаўнікі, для таго, каб знайсці тэхнічнае развязанне”.

Пры гэтым, са сцверджання Мароза, “яно знойдзенае” і ўжо рэалізуецца.

Кіраўнік ведамства чакае, што поўнае аднаўленне электразабеспячэння на прадпрыемстве зойме “не менш за тыдзень”.

Раней міністр па надзвычайных сітуацыях Вадзім Сіняўскі паведамляў, што пасля навальнічнага фронту ўночы10 ліпеня паступіла 4,5 тысыч зваротаў па дапамогу.

Паводле ягоных слоў, непагадзь " нанесла значную шкоду 27 населеным пунктам”.

У найбольш пацярпелым Магілёве (1,5 тысячы званкоў ад насельніцтва) было абясточана пяць ліній электраперадачы напружаннем 110 кВт. З-за мясцовай ЦЭЦ-2, якая выйшла з ладу, спынялася “Магілёўхімвалакно” (больш за 90% акцый належыць дзяржаве, уваходзіць у канцэрн “Белнафтахім”).

У той жа дзень падзенне дрэва падчас непагадзі прывяло да гібелі жанчыны ў Магілёве, гэта адбылося на рацэ Дняпро. 32-гадовая жанчына разам з мужам напярэдадні вечарам прыехала на рыбалку.

У Мінлясгасе паведамлялі, што адным з найбольш пацярпелых ад непагадзі стаў Клімавіцкі лясгас (Магілёўская вобласць). Там пацярпела блізу 300 гектараў лесу, сітуацыя патрабуе “правядзення суцэльнай санітарнай высечкі лесу".