Прэм'ер-міністр Швэцыі: Паўмеры больш не працуюць

• 14.07.2025, 11:19

Наступны бюджэт ЕЗ здзівіць.

Як піша для Politico прэм'ер-міністр Швэцыі Ульф Крыстэрсан, ЕЗ неабходная смелая змена прыярытэтаў, супастаўная ў маштабе са стварэннем адзінага рынку або ўвядзеннем еўра (пераклад - сайт Charter97.org). Ва ўмовах абмежаваных нацыянальных бюджэтаў акцэнт варта зрабіць не на размеркаванні сродкаў, а на стратэгічных інвестыцыях.

Наступны доўгатэрміновы бюджэт Еўрапейскага Звязу распрацоўваецца ва ўмовах беспрэцэдэнтных выклікаў: агрэсіі Расеі супраць Украіны, гібрыдных нападаў на еўрапейскія дэмакратыі і нестабільнай сусветнай эканомікі.

Першы прыярытэт - бяспека і абарона. Еўропа павінна стрымліваць Расею, працягваючы ўстойлівую і прадказальную падтрымку Украіны. Таксама краіны-чальцы павінны павялічыць выдаткі на абарону. Напрыклад, Швэцыя ўжо прыняла план дасягнення ўзроўню на 5% ВУП. Бюджэт ЕЗ, на думку Крыстэрсана, павінен стымуляваць супольныя распрацоўкі і закупкі ў сферы абароны, а таксама падтрымліваць паляпшэнне вайсковай мабільнасці.

Другі прыярытэт - міграцыя і ўнутраная бяспека. У ЕЗ назіраецца занадта высокі ўзровень нелегальнай міграцыі і нізкі ўзровень дэпартацый.

Трэці прыярытэт - рост канкурэнтаздольнасці праз падтрымку прыватных інвестыцый, інавацый і тэхналогій.

Нарэшце, падкрэслівае Крыстэрсан, важна ўзмацніць кантроль за выкананнем прынцыпаў прававой дзяржавы і выкарыстоўваць сродкі ЕЗ эфектыўна, без павелічэння агульнага бюджэту або новых пазык.

Свет мяняецца, і ЕЗ павінен мяняцца разам з ім — не паступова, а смела.