Нямеччына гатовая купіць два комплексы Patriot для перадачы Украіне

• 14.07.2025, 11:35

Бэрлін не будзе перадаваць Taurus.

Міністр абароны Нямеччыны Барыс Пісторыюс расказаў, што ягоная краіна вядзе перамовы з ЗША аб магчымасці купіць дзве сістэмы Patriot для Украіны.

У інтэрв'ю для Financial Times Пісторыюс расказаў, што ў Нямеччыне засталося мала сістэм супрацьпаветранай абароны Patriot, каб выдаваць іх Украіне.

Паводле ягоных слоў, у Нямеччыне было 12 гэтых “крытычна важных” сістэм, з якіх тры ўжо выдадзеныя Кіеву, дзве знаходзяцца ў Польшчы, а яшчэ адна пастаянна знаходзіцца на тэхабслугоўванні або задзейнічана ў навучанні.

Пісторыюс адзначыў, што ў Нямеччыне засталося толькі шэсць сістэм.

“Гэта сапраўды занадта мала, асабліва ўлічваючы мэты NATO наконт магчымасцяў, якіх мы павінны дасягнуць. Мы дакладна не можам даць больш", - сказаў ён.

Нямецкі міністр дадаў, што абмяркуе прапанову, якую ён зрабіў кіраўніку Пентагона Піту Хегсэту ў мінулым месяцы, каб дазволіць Нямеччыне купіць дзве сістэмы Patriot у ЗША для Кіева.

Аднак, ён адзначыў, што Нямеччына не будзе пастаўляць свае дальнабойныя ракеты Taurus Украіне, нягледзячы на хвалю нядаўніх паветраных нападаў Расеі і адноўлены запыт Кіева.