Скандал у арганізацыі: супрацоўнікаў ананімна апыталі аб непрыемных калегах, а потым абвясцілі прозвішчы

• 14.07.2025, 19:29

Адзін чалавек пайшоў скардзіцца.

У адной беларускай арганізацыі супрацоўнікаў папрасілі ананімна назваць калегаў з некарэктнымі паводзінамі, а потым прылюдна агучылі вынікі. Адзін з работнікаў паскардзіўся ў Нацыянальны цэнтр абароны персанальных звестак - там распавялі, чым скончылася справа.

На сходзе прафсаюза ў адной з арганізацый правялі ананімнае апытанне. У анкеце задавалі пытанні, напрыклад: «Хто, на вашу думку, паводзіць сябе некарэктна з калегамі?». Варыянты адказаў змяшчалі імёны і прозвішчы канкрэтных работнікаў.

Пазней вынікі гэтага апытання агучылі перад усімі сябрамі прафсаюза і адправілі ў саму арганізацыю для абмеркавання на камісіі.

Адзін з работнікаў падаў скаргу ў Цэнтр абароны персанальных звестак. Праверка паказала, што ў прафсаюза і арганізацыі не было законных падстаў для апрацоўкі персанальных звестак такім спосабам.

У выніку арганізацыя і прафсаюз атрымалі прадпісанне ліквідаваць парушэнні. Анкеты з персанальнымі звесткамі, паводле іх слоў, былі знішчаныя.