Парламент Косава праваліў 47-ю спробу пачаць працу

• 15.07.2025, 20:51

Дэпутаты не могуць абраць спікера.

Асамблея часткова прызнанага Косава не змагла закрыць устаноўчую сесію ў аўторак, што стала сорак сёмай правальнай спробай заканадаўцаў разблакаваць працу.

Пра гэта паведамляе балканская служба «Радыё Свабода».

Падзеі ў косаўскім парламенце ў аўторак разгортваліся паводле звыклай схемы. Тры найбуйнейшыя апазіцыйныя партыі адмовіліся дэлегаваць прадстаўнікоў у камісію, якая павінна была арганізаваць таемнае галасаванне для абрання спікера Асамблеі.

Гэтую ідэю прасоўвае найбуйнейшая партыя – рух «Самавызначэнне» кіраўніцы ўраду Альбіны Курт, якая бачыць у таемным галасаванні магчымасць разблакаваць прызначэнне спікера.

Без прызначэння спікера парламента і ягоных намеснікаў Асамблея Косава не можа закончыць устаноўчае паседжанне і пачаць паўнавартасную працу – уключаючы прызначэнне ўраду.

Праз гэта Косава знаходзіцца ў перманентным палітычным крызісе пасля парламенцкіх выбараў у пачатку лютага.

У канцы чэрвеня Канстытуцыйны суд Косава абавязаў дэпутатаў сфармаваць Асамблею цягам 30 дзён, але пастанова пакуль не паўплывала на сітуацыю, паколькі розныя партыі тлумачаць яе па-рознаму.

Прэзідэнт Косава мае паўнамоцтвы распусціць парламент і прызначыць датэрміновыя выбары, але пакуль устрымліваецца ад такога кроку, баючыся яшчэ большага палітычнага крызісу.