Іншаземец хацеў вылецець з Менска з раздрукаваным на прынтары пашпарце

• 16.07.2025, 16:10

Ён нездарма выкарыстаў такі «дакумент».

Раніцай 15 ліпеня іншаземец спрабаваў вылецець з Менска ў Стамбул. На памежным кантролі ён паказаў падазроны пашпарт. Высветлілася, што ён нездарма выкарыстаў такі «дакумент»

Памежны кантроль мужчына праходзіў на досвітку, планаваў паляцець у Стамбул. Супрацоўніцы ён паказаў пашпарт грамадзяніна Расеі 1993 года нараджэння. Спецправерка паказала, што ўсе старонкі дакумента надрукаваныя на звычайным прынтары.

«Акрамя таго, падчас разбору выяўлена, што іншаземец невыпадкова спрабаваў вылецець у Турцыю з падробленым пашпартам: ён знаходзіцца ў міждзяржаўным вышуку за крадзеж і выдачу хабару», — паведамілі ў ДПК.

Мужчыну затрымалі і адправілі ў ізалятар часовага ўтрымання ГУУС Менгарвыканкама.

За спробу незаконнага перасячэння мяжы парушальніку пагражае штраф да 4 200 рублёў (100 базавых адзінак). Акрамя таго, за падробку дакумента прадугледжаная крымінальная адказнасць - абмежаванне волі на тэрмін да двух гадоў.