У Менску пастаялец гатэля забыўся $50 тысячаў у нумары пад падушкай

• 16.07.2025, 21:21

Значныя грошы знайшла пакаёўка.

У Менску пастаялец гатэля забыўся 50000 даляраў у нумары пад падушкай. Падрабязнасці паведамляе агенцтва «Менск-Навіны».

Паведамляецца, што ў менскім гатэлі «Звязда» пакаёўка, якая працуе на 11 паверсе, заўважыла, што пастаялец моцна хваляваўся. Пасля ягонага ад'езду жанчына пайшла прыбіраць нумар. У момант запраўкі пасцелі пад падушкай яна знайшла пакет, у якім была буйная сума валюты.

Пакаёўка паведаміла пра знаходку ў адміністрацыю – атрымалася знайсці пастаяльца. Мужчына прызнаўся, што забыўся ў нумары 50000 даляраў.

– Паводле правіла, я адразу звярнулася да адміністратара, і калі кліент прыйшоў, перадала яму грошы. У нас людзі часта нешта забываюць, а з сумленнем угоды не заключаю, – паведаміла пакаёўка Антаніна Есьман.

У адміністрацыі гатэля сказалі, што пакаёўку ўзнагародзяць прэміяй і падзякай.