CEPA: Расея - ненадзейны супольнік

• 17.07.2025, 14:18

Трывожны званочак для беларускага дыктатара.

Пасля разбуральных удараў ЗША і Ізраіля па аб'ектах у Іране ў чэрвені Тэгеран апынуўся фактычна сам-насам з крызісам. Нягледзячы на шчыльнае супрацоўніцтва з Масквой, Крэмль не надаў хаўрусніку ні палітычнай, ні вайсковай дапамогі, падкрэсліўшы, што студзеньскае стратэгічнае пагадненне з Іранам не прадугледжвае ўзброенай падтрымкі, піша CEPA (пераклад — сайт Charter97.org).

Гэта паставіла пад сумнеў не толькі шчырасць альянсу, але і выклікала падазрэнні ў здрадзе. Паводле звестак расследавання The Insider, заснаванага на выцечках з ФСБ, паміж Расеяй і Іранам ідзе актыўная шпіёнская вайна, нягледзячы на фармальны саюз у кантэксце вайны ва Украіне.

Паводле дакументаў, Іран спрабуе займець расейскія тэхналогіі ў сферы турбарэактыўных рухавікоў, энэргетыкі, авіяцыі і беспілотнікаў, а таксама займаецца вярбоўкай сярод расейскіх дэлегацый. Расейскі бок занепакоены распаўсюджваньнем шыіцкай прапаганды і ўмацаваньнем уплыву Тэгерану сярод мусульманскіх грамад рэгіёну.

ФСБ уважае за важнае не толькі абарону тэхналогій ад выцечак, але і пранікненне ў спецслужбы Ірана, уключаючы выведвальную працу аб яго ядзернай праграме. Са звестак крыніц The Insider, яшчэ за прэзідэнтам Дзмітрыем Мядзведзевым у Расеі абмяркоўвалі Іран хутчэй як пагрозу, чым як хаўрусніка, і захоўвалі перакананне, што Ірану нельга дазволіць атрымаць ядзерную зброю.

На гэтым фоне ў Тэгеране могуць падазраваць, што Масква з ухвалой паставілася да ўдараў па іранскай ядзернай інфраструктуры.