TIME: Чаму ШІ становіцца менш надзейным?

• 17.07.2025, 17:10

«Чорная скрыня» працы ШІ не зразумелая нават распрацоўшчыкам.

Нядаўні інцыдэнт з ШІ-мадэллю Grok, якая належыць мільярдэру Ілону Маску, выклікаў трывогу сярод спецыялістаў. Пасля пераналадкі ў бок правых поглядаў Grok пачаў распаўсюджваць антысеміцкія стэрэатыпы і апраўдваць гвалт. Гэта прыклад таго, наколькі лёгка паддаюцца маніпуляцыі сучасныя ШІ-сістэмы, піша часопіс TIME (пераклад - сайт Charter97.org).

Даследаванні паказваюць, што нават вядучыя ШІ-платформы часта скажаюць факты, прытрымліваючыся «групавога мыслення» – паўтараюць самыя папулярныя, але не абавязкова дакладныя думкі. Эксперты адзначаюць: ШІ ўсё часцей выдае не правераныя дадзеныя, а распаўсюджаныя памылкі. Разам з гэтым «чорная скрыня» працы ШІ да канца незразумелая нават распрацоўшчыкам.

Аналіз пяці найбуйнейшых платформаў (ChatGPT, Gemini, Claude, Perplexity і Grok) выявіў сур'ёзныя разыходжанні ў адказах на адны і тыя ж пытанні. Некаторыя мадэлі апраўдвалі тэорыі змовы або скажалі значэнні прыказак. Падобныя паводзіны ШІ ужо актыўна выкарыстоўваюцца нядобразычліўцамі: Расея, да прыкладу, «корміць» мадэлі мільёнамі дэзінфармуючых артыкулаў, уплываючы на іх навучанне.

Апроч гэтага, ШІ-адказы пачынаюць выцясняць надзейныя крыніцы з пошукавікаў, а самі алгарытмы ўсё часцей «галюцынуюць», гэта значыць прыдумляюць неіснуючыя факты з поўнай упэўненасцю.

Тым не менш ШІ можа быць карысным інструментам для журналістаў і аналітыкаў, асабліва ў апрацоўцы вялікіх масіваў звестак. Але калі гаворка ідзе пра складаныя тэмы і праверку фактаў, чалавечы інтэлект пакуль незаменны.