Менскае «Дынама» вылецела з Лігі чэмпіёнаў

• 17.07.2025, 17:39

Цяпер менскія футбалісты прадоўжаць барацьбу ў Лізе канферэнцый.

Чэмпіён Беларусі даў бой балгарскаму "Лудагорцу" і быў блізкі да выніковай перамогі, аднак, на жаль, пакінуў турнір.

На мінулым тыдні беларусы мінімальна саступілі суперніку ў Балгарыі - з лікам 0:1. Задача на матч у адказ у венгерскім Мезекевешдзе была простай і зразумелай - перамагчы. Аднак ужо ў першым тайме балгары адкрылі лік.

Нягледзячы на гэта, беларусы правялі выдатны другі тайм і здолелі вярнуцца ў гульню: на 54-й хвіліне Мустафа Джымэ зраўняў лік, а неўзабаве Пэдра Ігор вывеў «Дынама» наперад. Агульны вынік у суме двух матчаў стаў роўны, такім ён заставаўся да канца асноўнага часу - і гульня перацякла ў дадатковы час.

Ну а там паспяховымі былі балгары. Пасля навесу ў дынамаўскую штрафную Шпакоўскі, які праводзіў упэўнены матч, не ўтрымаў мяч, і Эрык Біле дабіў яго ў беларускую браму. На табло стала 2:2, а ў суме двухматчавага супрацьстаяння — 3:2 на карысць “Лудагорца”.

Цяпер “Дынама” прадоўжыць барацьбу ў Лізе канферэнцый. Наступны супернік беларускага клуба - албанская каманда "Эгнатыя".