Жыхар Крэва раптоўна выявіў склад керамікі 17-га стагоддзя.

• 18.07.2025, 17:13

Знайшліся старадаўнія свістулькі-кукуці.

Жыхар аграгарадка Крэва ў Смаргонскім раёне капаў яму на надзеле і знайшоў шмат керамікі чатырохсотгадовай даўніны. Сярод вырабаў ёсць і кукуці - гліняныя свістулькі, піша праўладная газета «Светлы шлях».

Жыхар Крэва капаў яму для гаспадарчых патрэб на вуліцы Багданаўскай. Падчас працы знайшоў вялікую колькасць фрагментаў старадаўніх керамічных вырабаў. Знаходкай зацікавіліся археолагі.

“Нас зацікавіла гэтая знаходка, і мы пачалі распрацоўваць шурф на дадзеным участку. У выніку выявілі цэлы пласт керамікі XVII стагоддзя, ганчарныя інструменты, манеты таго перыяду, а таксама ўнікальныя для нашага рэгіёну артэфакты - кукуці - гліняныя свістулькі”, - распавёў вядучы навуковы супрацоўнік Інстытута гісторыі НАН Беларусі, кандыдат гістарычных навук Алег Дзярновіч.

Са слоў навукоўца, выяўленыя кукуці адносяцца да эпохі актыўнага этнакультурнага абмену паміж славянскімі і балцкімі народамі, што датуецца XIV-XV стагоддзямі.

"Знаходка мае асаблівае навуковае значэнне, паколькі такія прадметы матэрыяльнай культуры з'яўляюцца своеасаблівымі маркерамі, якія фіксуюць характар адносін паміж рознымі этнічнымі групамі на тэрыторыі сучаснай Беларусі", - адзначыў Дзярновіч.

Кукуць — гэта рэгіянальная назва глінянай свісцёлкі, утвораная ад літоўскага слова kukutis, якім сярод іншага літоўцы называюць удода. Беларускі назоў птушкі паходзіць ад гукапераймання яе спевам “уд-уд-уд”, але яго можна пачуць і як “ку-ку-ку”, хоць і не такое выразнае, як у зязюлі. Цікава, што іншая назва гэтай птушкі dudutis, якая суадносіцца з "дудкай".

Нагадаем, зараз археолагі Інстытута гісторыі НАН Беларусі працягваюць вывучаць рэшткі Крэўскага замка. Навукоўцы ўжо пацвердзілі існаванне трэцяй вежы замка, пра якую не было вядома раней, знайшлі драўляны элемент са слядамі пажару - мяркуюць, што гэта пажар 1433 года, калі князь Свідрыгайла штурмаваў Крэўскі замак. Знойдзеная і замкавая падлога XIV стагоддзя.