Вялікабрытанія панізіла кошт расейскай нафты

• 18.07.2025, 18:31

Лондан далучыўся да пастановы ЕЗ.

Вялікабрытанія далучылася да пастановы ЕЗ панізіць кошт расейскай нафты з $60 да $47,6 за бараль, вынікае з паведамлення Мінфіна краіны.

"Вялікабрытанія і яе хаўруснікі ў ЕЗ закручваюць гайкі", — заявіла міністр фінансаў краіны Рэйчэл Рыўс.

Раней такую ж пастанову прыняў ЕЗ. У Еўропе таксама забаранілі імпарт нафтапрадуктаў з сырой расейскай нафты з любых трэціх краін, за выключэннем Канады, Нарвегіі, Швайцарыі, Вялікабрытаніі і ЗША.

Таксама Еўропа ўвяла поўную забарону на аперацыі з "Паўночнымі плынямі". Абмежаванні ўведзеныя на пастаўку тавараў і паслуг для іх абслугоўвання. Гэта прадухіліць любое завяршэнне, эксплуатацыю і любое выкарыстанне трубаправодаў, паведамляў ЕЗ.

Пад еўрапейскія санкцыі таксама трапілі 14 фізічных асоб і 41 юрыдычная асоба.