Вялікабрытанія апублікавала імёны 18 шпіёнаў Пуціна
- 18.07.2025, 18:48
Лондан увёў санкцыі супраць трох падраздзяленняў і 18 афіцэраў ГВУ.
Лондан увёў санкцыі супраць 18 супрацоўнікаў Галоўнага ўпраўлення Генштаба УС РФ і трох яго падраздзяленняў, абвінавачаных у дзеяннях на тэрыторыі Вялікабрытаніі ці супраць яе і іншых заходніх краін. У апублікаваным спісе людзі, якія ўзломвалі тэлефон дачкі былога расейскага выведніка Сяргея Скрыпаля( яго і дачку потым атруцілі навічком), якія наводзілі ракеты на тэатр у Марыупалі, дзе ў 2022 годзе хаваліся сотні жанчын і дзяцей,Людзі. якія арганізоўвалі падпалы ў самой Вялікабрытаніі.
Супрацоўнікі расейскай вайсковай выведкі ГВУ ўдзельнічаюць у гібрыднай вайне, з дапамогай якой Уладзімір Пуцін спрабуе пасеяць хаос у Еўропе, заявіла ў пятніцу Міністэрства замежных спраў. Высілкі брытанцаў ў выкрыцці таемных аперацый шпіёнаў Пуціна былі падтрыманыя ФБР ЗША і выведвальнымі службамі шматлікіх краін NATO, адзначае The Telegraph.
Сярод тых, хто трапіў пад санкцыі, - вайсковая часць 26165 (або 85-ы галоўны цэнтр спецыяльнай службы - падраздзяленне Галоўнага ўпраўлення Генштаба). Яна таксама вядомая як хакерская групоўка, якая дзейнічае пад назвамі APT 28 і Fancy Bear. У чорны спіс унесеныя афіцэры Іван Ермакоў і Аляксей Лукашоў. Яны ўзламалі тэлефон Юліі Скрыпаль яшчэ за пяць гадоў да таго, як у 2018 годзе яе і бацьку атруцілі ў Солсберы іншыя агенты ГВУ. Ермакоў і Лукашоў таксама шукае ФБР за ўмяшанне ў прэзідэнцкія выбары 2016 года ў ЗША. Апроч гэтага, в/ч 26165 фігуравала ў расследаваннях умяшанняў у выбарныя і палітычныя працэсы ў Францыі і Нямеччыне. А ў 2022 годзе яна вяла анлайн-выведку, дапамагала арганізаваць удары па драмтэатры падчас аблогі Марыўпаля. Нягледзячы на тое, людзі, якія хаваліся ў ім, напісалі буйнымі літарамі на асфальце «ДЗЕЦІ»,тэатр быў разбураны расейскімі ракетамі, у выніку загінула некалькі сотняў чалавек.
Пад санкцыі таксама патрапілі в/ч 74455 і 29155. Улады Вялікабрытаніі адзначаюць,што расейскія шпіёны адказныя за цэлую серыю кібератак і дыверсійных аперацый, накіраваных на перашкоды вайсковавай дапамогі Украіне з боку заходніх хаўруснікаў. Брытанскія і еўрапейскія выведвальныя службы выявілі мноства выпадкаў мэтанакіраваных нападаў на парты, транспартныя вузлы, пункты памежнага кантролю і дзяржаўную інфраструктуру, адзначае The Telegraph.
У адным з іх расейскія хакеры падключыліся да камер назірання ля памежных пераходаў, вайсковых аб'ектаў на дарогах ва Украіне і суседніх краінах падчас маштабнай кампаніі, якая мела за мэту перашкодзіць арганізацыям, што займаюцца пастаўкамі Украіне.
Кіраўнікі расейскай дзяржавы прыцягвалі вайскоўцаў в/ч 29155 дзеля арганізацыі забойстваў, у тым ліку Скрыпалёў. У апошняе дзесяцігоддзе на яе ўскладалі адказнасць за выбухі на складах са зброяй у Чэхіі і Балгарыі, таксама і там, дзе захоўвалася прызначаная для Украіны прадукцыя.
Гэтая часць каардынавала кампанію найму маладых афганцаў дзеля арганізацыі нападаў талібаў на сілы заходняй кааліцыі на чале з ЗША да вываду амерыканскіх войскаў з Афганістана ў 2022 годзе.
Агенцтва Associated Press нядаўна апублікавала даследаванне, падчас якога выявіла больш за 70 інцыдэнтаў з пачатку вайны ва Украіне, у якіх заходнія праваахоўнікі ўстанавілі дакладную сувязь з Расеяй, прарасейскімі групамі або Беларуссю. Сярод актаў гібрыднай вайны - шпіянаж, падрыхтоўка забойства, падпалы, дыверсіі і акты сабатажу, кібератакі, вандалізм, выкарыстанне мігрантаў для дэстабілізацыі грамадскай сітуацыі, прапагандысцкія мерапрыемствы.
Сярод іх - падпал ва ўсходнім Лондане склада, звязанага з украінскай кампаніяй, якая пастаўляла на радзіму тэрміналы спадарожнікавага інтэрнэту Starlink. Яго арганізаваў брытанец, якога завербаваў супрацоўнік расейскай выведкі. «Ты - наш кінжал у Еўропе, і мы будзем цябе старанна наточваць. А затым пачнем выкарыстоўваць у сур'ёзных бітвах», - пісаў разведчык.
Суд у Лондане прызнаў вінаватымі ў падпале пецярых чалавек.
«Шпіёны ГВУ вядуць кампанію дэстабілізацыі Еўропы, падрыву суверэнітэту Украіны і пагрозы бяспецы брытанскіх грамадзян. Крэмль не павінен сумнявацца: мы бачым, што яны спрабуюць рабіць употай, і мы гэтага не пацерпім», - падкрэсліў міністр замежных спраў Вялікабрытаніі Дэвід Лэмі.