ЕЗ упершыню ўвёў санкцыі супраць кітайскіх банкаў за супрацоўніцтва з Расеяй
- 18.07.2025, 19:46
Пад абмежавальныя меры трапілі два банкі.
Еўрапейскі Звяз ўвёў два кітайскія банкі ў 18-ы пакет санкцый, накіраваны на стрымліванне расейскай ваеннай машыны. Гэта першы выпадак, калі фінансавыя ўстановы з Кітая патрапілі пад санкцыі ЕЗ за садзейнічанне агрэсіі Масквы супраць Украіны. Як паведамілі дыпламатычныя крыніцы South China Morning Post (SCMP), пад абмежавальныя меры патрапілі рэгіянальныя банкі Suifenhe Rural Commercial Bank і Heihe Rural Commercial Bank.
Гэтая пастанова можа атрымаць адказ з боку Кітая, які цягам некалькіх месяцаў актыўна прасоўваў вывядзенне гэтых банкаў з пакета, піша выданне. Са слоў крыніц, міністр замежных спраў КНР Ван І падчас ліпеньскай сустрэчы з кіраўніком еўрапейскай дыпламатыі Каяй Каллас неаднаразова – “тры ці чатыры разы” – папярэджваў: калі банкі ўнясуць у чорны спіс, то будзе ўслед адказ. У Брусэлі, як сцвярджаюць суразмоўцы SCMP, кітайскія дыпламаты разам з амбасадарам ў ЕЗ Цай Жунем, вялі з прадстаўнікамі Еўразвяза “адкрытыя перамовы”, спрабуючы паўплываць на выніковае рашэнне.
Нягледзячы на тое, што не ўдалося банкі вывесці са спісу,Пекін дамогся змякчэння ўмоў, адзначаюць крыніцы з ліку дыпламатаў. Еўрапейская камісія ўжо апавясціла паслоў краін ЕЗ аб тым, што спіс падлягае перагляду праз шэсць месяцаў. Калі крэдытныя арганізацыі дакажуць, што спынілі садзейнічанне расейскаму абароннаму сектару, іх могуць вывесці з санкцыйнага спісу.
Financial Times раней паведамляла, што згаданыя банкі выкарыстоўвалі крыптавалютныя аперацыі для абыходу дзеючых санкцый ЕЗ, спрыялі імпарту падсанкцыйных тавараў у Расею.
Хоць санкцыі супраць кітайскіх банкаў сталі беспрэцэдэнтнымі, з пачатку вайны Еўразвяз ужо ўнёс у чорныя спісы дзясяткі кітайскіх кампаній, абвінаваціўшы іх у пастаўках тавараў падвойнага прызначэння ў Расею. Кітай абвяргае гэтыя абвінавачванні, заяўляе пра"нармальныя" гандлёвыя адносіны з Масквой і адмаўляе якую-небудзь вайсковую дапамогу.
18 ліпеня Еўразвяз зацвердзіў 18-ы па ліку пакет антырасейскіх санкцыяў. Як паведамляе Reuters са спасылкай на дацкага дыпламата, ЕЗ мае намер панізіць кошты на расейскую нафту - да $47,6 за бараль - і заблакаваць выкарыстанне газаправодаў "Паўночная плынь".
Акрамя санкцый супраць кітайскіх банкаў, меры таксама закрануць экспарт тэхналогій, якія выкарыстоўваюць ў вытворчасці дронаў, і індыйскі нафтаперапрацоўчы завод, што належыць "Раснафце" і з’яўляецца яе галоўным замежным актывам.
Пад новыя абмежаванні патрапілі 22 расейскія крэдытныя арганізацыі, якія будуць адключаныя ад сістэмы SWIFT. "Мы абмяжоўваем яшчэ 105 судоў ценявога флоту і іх дапаможныя структуры, а таксама абмяжоўваем доступ расейскіх банкаў да міжнароднага фінансавання", – распавяла Кая Каллас.
Санкцыйныя спісы фізічных асоб таксама пашыраць: грамадзянам, якія трапілі пад абмежаванні, будуць замарожаныя актывы, а таксама адмоўлена ў выдачы віз для паездак у ЕЗ.
Кіраўнік МЗС Эстоніі Маргус Цахкна паведаміў, што Еўразвяз ужо пачаў падрыхтоўку да наступнага, 19-га пакета санкцый супраць Масквы.