Сырскі даклаў Зяленскаму пра сітуацыю на фронце

• 18.07.2025, 20:07

Абмеркавалі, сярод іншага, абарону на Пакроўскім кірунку і знішчэнне расейскіх ДРГ.

Прэзідэнт Украіны Уладзімір Зяленскі заслухаў даклад галоўнага камандзіра УСУ Аляксандра Сырскага пра сітуацыю на фронце. Абмеркавалі, сярод іншага, абарону на Пакроўскім кірунку і знішчэнне расейскіх ДРГ.

Пра гэта паведамляе Telegram прэзідэнта Украіны.

«Даклад галоўнага камандзіра Аляксандра Сырскага. Фронт, перш за ўсё абарона на Пакроўскім і іншых кірунках у Данецкай вобласці. Менавіта ў Данецкай вобласці сканцэнтравана больш за ўсё намаганняў акупанта. Я дзякую ўсім нашым падраздзяленням за стойкасць», – расказаў Зяленскі.

Прэзідэнт Украіны адзначыў за баі менавіта на Пакроўскім кірунку воінаў Сілаў спецыяльных аперацый і 59-й штурмавой брыгады Сілаў беспілотных сістэмаў. За баі на Навапаўлаўскім кірунку – воінаў 5-й штурмавой брыгады і 225-га асобнага штурмавога палку.

«Кожная расейская спроба прарывацца наперад павінна атрымліваць належны агнявы адказ украінскіх сілаў. Сярод іншага, знішчаем расейскія дыверсійныя групы, якія спрабуюць прасоўвацца і заходзіць ва ўкраінскія гарады і вёскі. Ні ў адной такой расейскай ДРГ шанцаў на выжыванне не будзе», – падкрэсліў Зяленскі.

Ён дадаў, што сёння Сырскі і міністр абароны Дзяніс Шмыгаль ужо абмяркоўвалі, якія сілы і сродкі неабходныя для больш выніковага знішчэння акупанта і больш адчувальных украінскіх дальнабойных удараў.

Паводле словаў прэзідэнта, украінскія войскі будуць максімальна забяспечаныя.

«Няпростай застаецца сітуацыя ў памежных раёнах Сумскай і Харкаўскай абласцей. Расейскае войска прадаўжае здзекавацца з нашых людзей на Херсоншчыне і Мікалаеўшчыне, атакуючы цывільных асобаў рознымі тыпамі дронаў. Будзем адказваць ім адчувальна. Дзякуй усім, хто забяспечвае Украіне неабходныя баявыя вынікі!» – дадаў кіраўнік дзяржавы.