Свірыдзенка: Трамп і Зяленскі дасягнулі палітычнай дамоўленасці аб продажы ўкраінскіх дронаў ЗША

• 18.07.2025, 20:51

Краіны абмяркоўваюць магчымасць заключыць «мегапагадненне».

Прэм'ерка Украіны Юлія Свірыдзенка пацвердзіла, што прэзідэнты Уладзімір Зяленскі і Дональд Трамп дасягнулі палітычнай дамоўленасці датычна інвестыцый ЗША ў вытворчасць і продаж украінскіх БПЛА.

Пра гэта яна заявіла падчас сустрэчы з журналістамі ў пятніцу, 18 ліпеня, паведамляе «Суспільне».

«Ёсць палітычная дамоўленасць. Гаворка ідзе пра інвестыцыі ў пашырэнне вытворчасці ва Украіне. Цяпер ужо новы міністр абароны Шмыгаль будзе распрацоўваць гэтую прапанову з амерыканскім бокам. Далей ужо будзе тэхнічная праца», – сказала Свірыдзенка.

Раней прэзідэнт Украіны ў інтэрв'ю New York Post паведаміў, што разам з Трампам абмяркоўваюць магчымасць заключыць «мегапагадненне», паводле якога ЗША будуць набываць украінскія беспілотнікі, выпрабаваныя ў баях, а Украіна ў адказ набудзе пэўную колькасць амерыканскай зброі.

Паводле ягоных словаў, падчас апошніх перамоваў з Трампам размова ішла пра пагадненне, якое дало б магчымасць абедзвюм краінам супрацоўнічаць у сферы паветраных тэхналогій. Украіна, са свайго боку, гатовая падзяліцца досведам, атрыманым за тры гады вайны з Расеяй.

На думку прэзідэнта Зяленскага, ва Украіны ёсць мноства ўнікальных дронаў – і пры гэтым Кіеў хоча набыць эксклюзіўную амерыканскую зброю.

14 ліпеня Дональд Трамп абвясціў, што ЗША і NATO заключылі пагадненне аб пастаўках зброі ва Украіну. Паводле ягоных словаў, ЗША будуць вырабляць «найлепшую ў свеце» зброю і прадаваць яе NATO, а Альянс будзе каардынаваць пастаўкі ва Украіну.

Трамп таксама сказаў, што дзякуючы дамове Украіна атрымае ўзбраенне на мільярды даляраў. Ён заявіў, што «вельмі незадаволены» Расеяй, і прыгразіў 100% мытамі, калі за 50 дзён мірнае пагадненне з Украінай не будзе дасягнутае.