Дроны УСУ разбілі аэрадром у Крыме

• 18.07.2025, 21:08

Спалены «Панцыр» і гелікаптэры.

Акупаваны Крым зноў трапіў у цэнтр увагі: у пачатку ліпеня ўкраінскія беспілотнікі нанеслі прыцэльны ўдар па расейскім ваенным аэрадроме Кіраўскі ў аднайменным пасёлку.

Пра гэта паведаміў 18 ліпеня мілітарны Тэлеграм-канал «Дасье шпіёна», звязаны з УС РФ.

Атака праводзілася з ужываннем трох ударных беспілотнікаў і была накіраваная па зоне адказнасці 18-га зенітнага ракетнага палку (в/ч 85388, Феадосія).

У выніку ўдару, паводле звестак крыніцы, цалкам знішчаны зенітны ракетна-гарматны комплекс «Панцыр-С1». Таксама згарэў шматмэтавы гелікаптэр «Мі-8» (бартавы нумар 333) і атрымаў сур'ёзныя пашкоджанні цяжкі транспартны гелікаптэр «Мі-26» (бартавы нумар 444).

Стратаў сярод расейскіх вайскоўцаў не зафіксавана, аднак шкода тэхніцы была значнай.

Паводле папярэдняй ацэнкі, знішчаны «Панцыр-С1» каштуе блізу 15 мільёнаў даляраў, згарэлы Мі-8 – прыкладна 5 мільёнаў даляраў, а пашкоджаны Мі-26 можа заважыць на 20 мільёнаў даляраў у залежнасці ад характару разбурэнняў. Агульны памер стратаў можа дасягаць 40 мільёнаў даляраў.