Трамп раскрытыкаваў Пуціна і паабяцаў адправіць зброю Украіне

• 8.07.2025, 7:36

Пентагон адразу ж заявіў аб аднаўленні паставак.

Злучаныя Штаты Амерыкі дадуць Украіне ў рамках вайсковай дапамогі зброю для абароны.

Як паведамляе РБК-Украіна, пра гэта заявіў прэзідэнт ЗША Дональд Трамп падчас сустрэчы з прэм'ер-міністрам Ізраіля Біньямінам Нэтаньяху.

«Нам давядзецца адправіць яшчэ зброю, мы абавязаныя гэта зрабіць. Яны павінны быць здольныя бараніцца. Па іх вельмі моцна б'юць. Нам давядзецца паслаць больш зброі, абароннай зброі - у першую чаргу», - сказаў ён.

Са слоў амерыканскага лідара, ён вельмі моцна расчараваны тым, што расейскі дыктатар Уладзімір Пуцін не спыняецца. Трамп падкрэсліў, што гінуць людзі.

«Я расчараваны тым, што прэзідэнт Пуцін не спыніўся», - абурыўся ён, дадаўшы, што кіраўнік Крамля, мяркуючы з усяго, не збіраецца спыняць вайну.

Рэакцыя Пентагона

У Пентагоне апублікавалі паведамленне аб аднаўленні паставак зброі Украіне пасля заявы Трампа аб неабходнасці дапамогі Кіеву ў абаронных пастаўках.

«На ўказанне прэзідэнта Трампа Міністэрства абароны адпраўляе дадатковую абаронную зброю ва Украіну, каб украінцы маглі абараняцца, пакуль мы будзем працаваць над забеспячэннем працяглага міру і спыненнем забойстваў», - сказана ў паведамленні.