На вайне ва Украіне ліквідавалі экс-дырэктара двух аршанскіх заводаў

• 8.07.2025, 12:01

У 2023 годзе ён падпісаў кантракт з расейскімі акупантамі.

На вайне ва Украіне загінуў былы дырэктар Аршанскага авіярамонтнага завода Уладзімір Троіцкі. Паводле праекта «Хачу жыць», 1 верасня 2023 года Троіцкі падпісаў кантракт з войскам РФ, а ўжо 5 лістапада загінуў на вайне, піша тэлеграм-канал «Витебск, я гуляю!».

Гісторыя Уладзіміра Троіцкага атрымала шырокую агалоску ў 2018 годзе — тады былога дырэктара Аршанскага авіярамонтнага завода (ААРЗ), які займаў гэтую пасаду ў 2007—2015 гадах, прысудзілі да чатырох гадоў калоніі ўзмоцненага рэжыму з канфіскацыяй маёмасці. Яго абвінавацілі ў злоўжыванні службовым становішчам і прычыненні шкоды пры выкананні будаўнічых работ на аэрадроме.

Сам Троіцкі сцвярджаў, што стаў ахвярай «замовы» з боку гендырэктара «Матор Січ» Вячаслава Багуслаева - у тыя гады ўкраінская кампанія набыла 60% акцый ААРЗ і планавала інвеставаць у прадпрыемства, але ўгода неўзабаве застопарылася.

Цікава, што сам Багуслаеў у 2022 годзе быў арыштаваны СБУ паводле абвінавачання ў калабарацыянізме, пазбаўлены ўсіх дзяржаўных узнагарод і патрапіў пад міжнародныя санкцыі.

Пасля крымінальнай справы Троіцкага знялі з пасады. У Воршы ён апынуўся ў ізаляцыі, з яго слоў, стаў выгнанцам. Аднак, у 2016 годзе яго яшчэ на непрацяглы час прызначылі дырэктарам Аршанскага інструментальнага завода. А ўжо ў лютым 2018 года суд вынес прысуд.

На 31 студзеня 2023 года Троіцкі лічыўся за філіялам «Віцьба» дзяржпрадпрыемства «ВК 12-ВАЛ». Магчыма, ён адбываў тэрмін у ВК-3, а пасля вызвалення быў працаўладкаваны на вытворчасці.

Цікава, што ўлетку 2024 гада віцебскі атрад ПСА адшукваў яго сваякоў. Магчыма, увесь гэты час цела Троіцкага так і заставалася непахаваным.