Новы расейскі БПЛА «Альтаір» спаліў жылы дом у Казані

• 8.07.2025, 18:55

Выпрабаванні прайшлі «з сюрпрызам».

У Татарстане ў Расеі выпрабавалі новы беспілотнік «Альтаір». Той страціў кіраванне і атакаваў жылы дом ды спаліў яго дашчэнту. Пра выпрабаванні новага БПЛА паведамілі ва ўкраінскім тэлеграм-канале DroneBomber.

«Верагодна БПЛА "Альтаір" упаў на жылы дом падчас выпрабавальнага палёту ў Казані», – гаворыцца ў паведамленні.

Таксама расследавальнікі праекту In Factum схіляюцца да меркавання, што менавіта «Альтаір» «прызямліўся» на дом у Казані.

«Тым часам расейцы страцілі яшчэ адзін перспектыўны БПЛА вялікай даўжыні палёту. На гэты раз – "Альтыус" ("Альтаір"). Першым быў С-70 "Паляўнічы"», – гаворыцца ў паведамленні.

БпЛА «Альтаір» заяўлены, як самы сучасны расейскі беспілотнік-выведнік павышанай далёкасці палёту. Ён можа несці ракеты і бомбы вагой да 1 тоны. Прызначаны і для баявых аперацый, з'яўляецца своеасаблівым аналагам амерыканскага MQ-9 Reaper.