NYT: Перад Іланам Маскам стаіць задача касмічнай складанасці

• 8.07.2025, 14:06

Якія перспектывы «Амерыканскай партыі» ў ЗША?

Мільярдэр Ілан Маск абвясціў пра стварэнне новай палітычнай сілы – «Амерыканскай партыі», заявіўшы пра намер кінуць выклік дамінаванню дэмакратаў і рэспубліканцаў. Аднак эксперты сумняваюцца ў рэальнасці і ўстойлівасці гэтай ініцыятывы, піша The New York Times (пераклад – сайт Charter97.org).

Нягледзячы на гучную заяву ў сацсетцы X, партыя яшчэ не зарэгістраваная ў Федэральнай выбарчай камісіі. Паводле звестак крыніцаў, абмеркаванні на гэтую тэму вядуцца толькі на канцэптуальным узроўні, а пэўныя крокі пакуль адсутнічаюць. Маск і ягоныя дарадцы разглядаюць магчымасць запуску супер-PAC – палітычнага камітэта для збору сродкаў і арганізацыі падтрымкі.

Стварэнне паўнавартаснай партыі ў ЗША патрабуе вялізных рэсурсаў і пераадолення складаных юрыдычных бар'ераў. Напрыклад, для ўдзелу кандыдатаў ад новай партыі ў выбарах у Кангрэс спатрэбіцца сабраць дзясяткі тысячаў подпісаў у кожным штаце – у Джорджыі іх колькасць дасягае 27000. Агульныя выдаткі на кампанію могуць перавысіць $50 млн. Акрамя таго, у некаторых штатах, напрыклад у Нью-Ёрку, могуць узнікнуць праблемы нават з самой назвай партыі.

Гісторыя трэціх партыяў у ЗША паказвае, што яны рэдка дамагаюцца ўстойлівага поспеху. Прыклады – партыі Роса Перо, Ральфа Нэйдэра. Сам Маск пакуль не прапанаваў дакладнай палітычнай праграмы, акрамя крытыкі Трампа і заклікаў да зніжэння дэфіцыту бюджэту.

Некаторыя эксперты мяркуюць, што Маску будзе прасцей дзейнічаць унутры існай сістэмы, прасоўваючы сваіх хаўруснікаў сярод рэспубліканцаў. Альтэрнатывай можа стаць супрацоўніцтва з ужо існымі партыямі, такімі як лібертарыянцы.

Пакуль жа зразумела адно: нават для чалавека, які марыць заваяваць Марс, стварыць палітычную партыю ў ЗША – задача амаль касмічнай складанасці.