«Пуцін павёў сябе як прыдурак»
- 8.07.2025, 14:35
Учынак кіраўніка Крамля раззлаваў Вашынгтон.
Прэзідэнт ЗША Дональд Трамп прыняў пастанову неадкладна аднавіць ваенныя пастаўкі Украіне, у тым ліку супрацьпаветраныя ракеты для комплексаў Patriot.
Знаёмая з пастановай крыніца сказала, што «Пуцін павёў сябе як прыдурак» (Putin was a jerk).
Уплывовае амерыканскае выданне Axios піша, што гэтым крокам Трамп адказаў на самы маштабны авіяўдар Расеі па Украіне за ўвесь час свайго прэзідэнцтва. Падчас тэлефоннай размовы з Уладзімірам Зяленскім у пятніцу Трамп паабяцаў перадаць Кіеву 10 ракетаў Patriot і дапамагчы знайсці іншыя боепрыпасы. Паводле словаў суразмоўцы з яго атачэння, расейскі прэзідэнт канчаткова перайшоў мяжу.
Паварот у стасунках
Калісьці Дональд Трамп уважаўся ледзь не за самага стрыманага заходняга лідара ў дачыненні да Крамля.
Ён казаў сваім давераным асобам, што «гэта не ягоная вайна», і доўга ўнікаў актыўнага ўмяшання, абмяжоўваючыся асцярожнымі заявамі.
Але ўсё змянілася пасля новага авіяўдару Расеі – адразу пасля тэлефоннага кантакту з Трампам. Паводле звестак Axios, гэты цынічны акт стаў апошняй кропляй і прадэманстраваў, што Пуцін не мае намеру спыняцца.
Нямеччына падключаецца
Асобны ціск на Белы дом стварыў канцлер Нямеччыны Фрыдрых Мерц. Ён патэлефанаваў Трампу і прапанаваў перадаць Украіне ракеты Patriot. Нямеччына нават выказала гатоўнасць набыць амерыканскія комплексы і супольна з Вашынгтонам фінансаваць іх пастаўку Кіеву.
Паводле словаў крыніцаў, Трамп прапанаваў Берліну альтэрнатыву: перадаць адну са сваіх батарэй і падзяліць кошт угоды. Канчатковай дамовы бакі пакуль не дасягнулі, але абмеркаванні прадаўжаюцца.
«Гэта не мая вайна», якая становіцца ягонай вайной
Да нядаўняга часу Трамп меркаваў, што маштабная падтрымка Украіны можа ўблытаць ЗША ў канфлікт. Але пасля бамбавання Ірана ў чэрвені і новых удараў Пуціна па ўкраінскіх гарадах прэзідэнт, паводле словаў дарадцаў, зразумеў: далей адмоўчвацца немагчыма.
Цяпер Пентагон ужо рыхтуе пастаўкі зброі. Паводле інфармацыі Axios, першыя партыі ракетаў і боепрыпасаў могуць скіравацца ва Украіну ў найбліжэйшыя тыдні. Ваенныя пастаўкі ЗША Кіеву былі прыпыненыя ў чэрвені, калі Пентагон пераглядаў запасы пасля нападаў па іранскіх аб'ектах.
На мінулым тыдні Трамп заяўляў, што Украіна павінна сама шукаць развязанне канфлікту. Але дзеянні Пуціна зрабілі сваё: Белы дом наважыўся на новы курс.