FT: Японскі бізнэс абвінаваціў Токіа ў «памылцы» на перамовах з ЗША

• 8.07.2025, 14:53

Новыя тарыфы закранулі Японію, Паўднёвую Карэю, Малайзію і Тайланд.

Асноўныя прадстаўнікі японскага бізнэсу раскрытыкавалі ўрад за стратэгічныя пралікі ў гандлёвых перамовах з ЗША пасля ўвядзення прэзідэнтам ЗША Дональдам Трампам 25-адсоткавых тарыфаў на японскія тавары, піша Financial Times (пераклад – сайт Charter97.org).

Кіраўнік карпарацыі Suntory і старшыня Японскай асацыяцыі карпаратыўных дырэктараў Такэсі Ніін заявіў, што патрабаванне Токіа аб поўным вызваленні ад мытаў стала «вялікай памылкай». Паводле ягоных словаў, японскія перамоўнікі недаацанілі катэгарычнасць Трампа і страцілі магчымасць дамовіцца хоць бы пра 10-адсоткавую стаўку.

«Яны думалі, што час гуляе на баку Японіі. Гэта была памылка», – адзначыў Ніінамі ў інтэрв'ю Financial Times.

Ніінамі папярэдзіў, што ў Токіа застаецца ўсё менш часу для дасягнення ўгоды да выбараў у верхнюю палату парламента 20 ліпеня, дзе кіроўная Ліберальна-дэмакратычная партыя прэм'ер-міністра Сігэру Ісібы рызыкуе страціць пазіцыі.

Трамп абвясціў пра новыя тарыфы, у тым ліку датычна Паўднёвай Карэі, Малайзіі і Тайланда. Яны пачнуць дзеянне 1 жніўня. Японскія перамовы з ЗША зайшлі ў тупік, нягледзячы на аптымістычныя заявы бакоў.

Паводле словаў аналітыкаў, адмова Токіа саступіць у пытанні імпарту амерыканскага рысу і аўтамабіляў зрабіла негатыўны ўплыў. Эксперты мяркуюць, што Японіі неабходна заняць больш прагматычную пазіцыю, калі яна хоча дасягнуць пагаднення да жніўня.