УСУ паказалі, як палонныя расейцы адбудоўваюць Ізюм
- 8.07.2025, 14:55
Відэафакт.
Расейскіх акупантаў, якія патрапілі ў палон да УСУ, пачалі задзейнічаць у аднаўленні разбураных імі населеных пунктаў Украіны. Сярод іншага, кіраўніцтва 3-й штурмавой брыгады задзейнічала іх у аднаўленні горада Ізюм на Харкаўшчыне. Пра гэта паведамляе «Мы – Украіна».
Так, кіраўніцтва брыгады прагледзела спісы расейскіх ваеннапалонных і вылучыла сярод іх акупантаў, якія ў цывільным жыцці мелі справу з будаўніцтвам або маюць дачыненне да гэтай сферы. Іх сабралі ў адным памяшканні і абвясцілі, чым яны будуць займацца ў найбліжэйшы час, каб не праседжваць проста так штаны ва ўкраінскім палоне.
«Калі будзеце нармальна сябе паводзіць, будзем карміць. Усіх будзем задзейнічаць. Там сонейка, добрае надвор'е. Вам давераная важная місія – лепш, чым ламаць, заўсёды будаваць. Мне, напрыклад, вельмі падабаецца ваяваць, але будаваць падабаецца больш», – сказаў камандзір 3-й штурмавой брыгады Андрэй Білецкі.
Тым часам акупанты расхвалявацца, што іх могуць «забіць» мясцовыя.
«Беручы да ўвагі нашае становішча, што мы ваеннапалонныя, расейскія акупанты... нас мясцовыя не заб'юць? Калі мы будзем дапамагаць у аднаўленні?» – пацікавіўся адзін з прысутных расейцаў.
На што Білецкі адказаў, што іх у выпадку чаго абароняць, і яны будуць не адны.
Далей акупантаў перадалі камандзіру асобнага ўзводу 3-й штурмавой брыгады з поклічам «Баця», і той прайшоўся па спісе палонных, пытаючыся іх добраахвотную згоду на «працаўладкаванне» і папярэдне агучыў іх будучыя задачы.
«Паступіла каманда задзейнічаць вас у рамонце і разборцы завалаў, таго ўсяго, што нарабіла ваша войска. У мяне ёсць вашыя поклічы з вашымі прафесіямі. Кіроўца-мэбляр “Дылер” – шпакоўню зрабіць зможаш? Падыходзіш... “Гермес” – мастак-дэкаратар... Прыгожа дровы скласці зможаш?.. Падыходзіш...» – гаварыў «Баця» з акупантамі.
У Ізюме будаўнікам-расейцам раздалі салатавыя апазнавальныя будаўнічыя камізэлькі і далі фронт працы.
Між тым акупанты прызнаюцца, што працаваць у тыле – спакайней, чым ваяваць на фронце. Яны кажуць, што ва Украіне іх нармальна кормяць, калі ва УС РФ ім выдавалі адзін сухпаек на тыдзень.
«Праца лёгкая. Пасадкі няхай ідуць куды далей, я лепш тут папрацую», – кажа палонны акупант.
Мясцовыя выйшлі паглядзець на працу расейцаў у аднаўленні Украіны, як на цуд.
«3-я штурмавая прапанавала дапамогу, я не чакала, што такая дапамога будзе», – кажа адна з мясцовых жыхарак.