Newsweek: Ценевы флот расейскіх танкераў ахапіла загадкавая хвароба

• 8.07.2025, 15:02

Ужо пяць караблёў атрымалі значныя пашкоджанні з незразумелых прычынаў.

Ценевы танкерны флот Пуціна пачаў пакутаваць ад загадкавай «хваробы» – выбухаў, якія не маюць тлумачэння. Эксперты не выключаюць, што гэта Украіна звярнулася да практычных «санкцыяў», хоць доказаў няма, піша Newsweek

Выданне аналізуе серыю выбухаў, ад якіх пацярпелі ўжо пяць расейскіх танкераў. Апошні такі эпізод адбыўся ў порце Усць-Луга ля Санкт-Пецярбурга.

Украіна не ўзяла на сябе адказнасць за гэтыя інцыдэнты, але СМІ адзначалі, што ўкраінскія спецслужбы часта праводзяць таемныя аперацыі супраць расейскіх інтарэсаў.

Вольга Палішчук з аналітычнай фірмы ACLED паведаміла Newsweek, што «не з'яўляецца глупствам меркаваць пра датычнасць Украіны» да гэтых выбухаў. Бо гэтыя танкеры задзейнічаныя ў эканамічнай падтрымцы расейскай узброенай агрэсіі супраць Украіны, а раней украінскія дроны ўжо атакавалі расейскія нафтаперапрацоўчыя заводы.

«Беручы да ўвагі маштабы папярэдніх нападаў, месца правядзення цяперашняй атакі і характар цэлі, цалкам абгрунтаванае меркаваць пра датычнасць Украіны, хоць ёсць і іншыя магчымыя прычыны», – заявіла Палішчук.

Цікавы той факт, што ўсе пяць пацярпелых танкераў заходзілі не толькі ў расейскія парты ў апошні час, яны таксама прайшлі праз вонкавыя партовыя межы астраўной дзяржавы Мальта ў Міжземным моры.