На Беларусь рушыць магутны цыклон

• 8.07.2025, 22:17

Абвешчаны аранжавы ўзровень небяспекі.

Напярэдадні над Генуэзскім залівам сфармаваўся новы цыклон, якому нямецкія метэаролагі далі імя «Габрыэль». Ён рушыць у бок Беларусі, несучы з сабой шмат цёплага і вільготнага паветра з Міжземнага мора. 9 ліпеня чакаюцца моцныя залевы, а на поўначы ўзнікнуць умовы, спрыяльныя для смерчаў, піша тэлеграм-канал «Метэавайб». Сіноптыкі папярэдзілі пра аранжавы ўзровень небяспекі.

У ноч на 9 ліпеня паўднёвыя рэгіёны Беларусі першымі адчуюць уплыў цыклону – там чакаюцца дажджы, навальніцы, месцамі моцныя залевы. Раніцай і днём непагадзь ахопіць амаль усю краіну: пройдуць дажджы, месцамі ліўні з навальніцамі і нават градам, асабліва на поўначы. Пры навальніцах магчымыя шквалы з парывамі ветру да 15–20 м/с. На захадзе можа выпасці больш за 50 мм ападкаў за суткі.

Але самае цікавае чакаецца ў другой палове дня, асабліва на паўночным усходзе Беларусі. Там складаюцца вельмі нестабільныя атмасферныя ўмовы: шмат цяпла, вільготнасці і моцныя перапады ветру на розных вышынях. Усё гэта стварае рызыку ўтварэння так званых суперячэек – магутных навальнічных сістэмаў, здольных спарадзіць смерчы.

Між тым Белгідрамет выпусціў папярэджанне пра аранжавы ўзровень небяспекі на 9 ліпеня.

«9 ліпеня (серада) на большай частцы тэрыторыі краіны чакаюцца навальніцы, пры навальніцах месцамі шквалістае ўзмацненне ветру парывамі 15–20 м/с. Уначы па паўднёвым захадзе, днём па паўночна-заходняй палове краіны – моцныя дажджы. У дзённы час па ўсходзе краіны максімальная тэмпература паветра дасягне +30…+32°С. У Менску чакаецца навальніца», – паведамляюць сіноптыкі.