ЕЗ даў канчатковую згоду на пераход Балгарыі на еўра

• 8.07.2025, 16:44

У студзені Балгарыя стане 21-й краінай, якая выкарыстоўвае еўра ў якасці нацвалюты.

Балгарыя зможа перайсці на адзіную еўрапейскую валюту ў студзені 2026 года. У аўторак, 8 ліпеня, міністры фінансаў краінаў ЕЗ падпісалі ў Брусэлі неабходныя прававыя акты. Тым самым Еўразвяз даў канчатковую згоду на прыняцце Балгарыі ў еўразону, і яна стане 21-й краінай у зоне адзінай валюты.

З 1 студзеня Балгарыя заменіць нацыянальную валюту леў на еўра. Абменны курс устаноўлены на ўзроўні 1,95583 лева за 1 еўра.

Працэс уступлення Балгарыі ў еўразону

У пачатку чэрвеня згоду на прыняцце Балгарыі ў еўразону дала Еўрапейская камісія. Краіна выканала неабходныя крытэры і «зойме сваё законнае месца ў фармаванні ключавых пастановаў еўразоны», заявіла брусэльская ўстанова. Еўрапейскі цэнтральны банк (ЕЦБ) таксама палічыў балгарскую эканоміку дастаткова падрыхтаванай да пераходу на еўра. Урад у Сафіі прыняў каласальныя намаганні ў правядзенні неабходных рэформаў, растлумачыў галоўны эканаміст ЕЦБ Філіп Лэйн. У сярэдзіне чэрвеня рэкамендавалі Балгарыю да ўступлення ў супольнасць краінаў еўра кіраўнікі дзяржаваў і ўрадаў Еўрагрупы.

Балгарыя імкнулася да ўвядзення еўра яшчэ некалькі гадоў таму, але не змагла гэта зрабіць праз высокую інфляцыю, паколькі адным з крытэраў для ўступлення ў еўразону з'яўляецца «ўстойлівая стабільнасць коштаў». У 2024 годзе паказнік інфляцыі ў Балгарыі склаў 2,7 адсотка, што крыху ніжэй за патрабаваны паказнік. Балгарскі леў з 2020 года прывязаны да еўра праз механізм абменнага курсу.

Планы пераходу на еўра здзяйсняюцца ў Балгарыі на фоне масавых пратэстаў. Прарасейскія і нацыяналістычныя сілы, якія выступаюць супраць уступлення ў еўразону, заклікалі да новых акцый пратэсту 8 ліпеня. З пачатку 2025 года Балгарыя з'яўляецца таксама паўнапраўным чальцом Шэнгенскай зоны.