«Мой рост 180 см, а трафей апынуўся нават крыху даўжэйшы»

• 8.07.2025, 21:02

Сома, які «пацягнуў» на 50 кг, беларус сфатаграфаваў і адпусціў у раку.

Гісторыю незабыўнай рыбалкі парталу fishingby расказаў Яўген Юхнік. Ён прызнаўся, што не з'яўляецца асабліва дасведчаным рыбаком у лоўлі сома.Яўген толькі тры разы вудзіў гэтую рыбу.

«Першая рыбалка - тролінгам на Прыпяці ў раёне Турава, тады дастаў шэсць самоў вагой ад 1,5 да 4,6 кг. Падчас другой нікога не злавіў І вось, пазаўчора зноў вярнуўся з Прыпяці…», - дзеліцца рыбак.

Сома Яўген злавіў тролінгам на воблер Rapala Dancer 110. Шалі паказалі 40 кг, але хвост ляжаў на зямлі, таму што рыбіну не змаглі цалкам падняць. Рыбак мяркуе, што рэальная вага сома амаль 50 кг.

"Мой рост 180 см, а трафей нават крыху даўжэйшы", - адзначыў ён.

Пасля ўзважвання і некалькіх здымкаў сома адпусцілі назад у раку.