Што азначае рэзкі разварот Трампа ў дачыненні да Украіны?
- 9.07.2025, 8:10
Выданне The Economist дало ацэнку.
Пастанова прэзідэнта ЗША Дональда Трампа аднавіць пастаўкі зброі Украіне яшчэ не азначае яго стратэгічнага развароту да паслядоўнай падтрымкі Украіны – хутчэй гэта часовая саступка, закліканая ўнікнуць поўнай яе паразы, што магло б стаць рэпутацыйнай катастрофай для самога кіраўніка Белага дому, піша The Economist.
Выданне нагадвае, што калі ЗША ў пачатку ліпеня спынілі пастаўкі зброі Украіне, гэтым яны шакавалі і саму Украіну, і еўрапейскіх хаўруснікаў. Але ўжо 7 ліпеня Трамп нечакана раздумаўся, матывуючы сваю пастанову тым, што Украіна павінна абараняцца. Праз некалькі гадзінаў і Пентагон пацвердзіў, што накіруе «дадатковую абарончую зброю».
Тлумачэнне Пентагона, што спыненне паставак зброі абумоўленае нібыта неабходнасцю перагляду запасаў, выданне назвала «пераважна дэзынфармацыяй».
«Так, дэфіцыт сродкаў СПА ёсць, аднак зброя для Украіны паступае з вытворчых ліній падраднікаў, а не са складоў войска ЗША. Ізраіль, напрыклад, прадаўжаў атрымліваць узбраенне без перабояў нават падчас вайны з Іранам», – гаворыцца ў матэрыяле.
Выданне мяркуе, што Трамп прынізіў Пентагон, скасаваўшы ягоную пастанову датычна Украіны, і гэтая змена пазіцыі прэзідэнта ЗША сведчыць, што «нават найбліжэйшыя паплечнікі не могуць прадбачыць рэзкія павароты Трампа».
У той самы час гэты ягоны крок, адзначаецца, з'яўляецца перамогай здаровага сэнсу, бо ў апошні час Украіна перажывае самыя інтэнсіўныя абстрэлы з пачатку расейскага ўварвання, і спыніць амерыканскую падтрымку – гэта было б фактычна дазволіць агрэсару бяскарна рабіць усё, што яму захочацца.
Аднак, адзначаецца, не варта думаць, што Трамп раптам стаў прыхільнікам Украіны. Маўляў, аднаўленне паставак – толькі вяртанне да папярэдняга стану, калі дапамога, вылучаная папярэднім прэзідэнтам Джо Байдэнам, згортвалася паступова. Сам жа Трамп пакуль не рабіў ніякіх заяваў пра намер дапамагаць Украіне.
«Дзясяткі мільярдаў даляраў дапамогі, зацверджаныя Кангрэсам летась, да гэтага часу не вылучаныя. Новых сродкаў Кангрэс таксама не прадугледзеў. У “вялікім выдатным” падаткова-бюджэтным законе, падпісаным Трампам, грошай для Украіны няма. Нават тыя невялікія сумы, якія былі ў базавым бюджэце Пентагона, плануюць скараціць яшчэ больш у праекце на 2026 год», – гаворыцца ў артыкуле.
Зрэшты, Трамп прынамсі ўсвядоміў, што расейскі дыктатар Уладзімір Пуцін яго проста выкарыстоўвае. Прэзідэнт ЗША не хоча марнаваць больш сродкаў на перамогу Украіны, але таксама не хоча яе паразы пры сваім прэзідэнцтве. Верагодна, мяркуецца, ён разумее, што крах Украіны стане для ЗША геапалітычнай катастрофай, яшчэ горшай, чым падзенне Афганістана ў 2021 годзе.