Дроны магутна атакавалі ўскраіны Масквы

• 9.07.2025, 9:09

У расейцаў пачалася паніка праз выбухі.

У ноч на 9 ліпеня расейцы паскардзіліся на ўдар дронаў па Расейскай Федэрацыі і на выбухі, якія раздаваліся ў небе над Зеленаградам і Сонечнагорскам у Маскоўскай вобласці, піша «Фокус».

Падмаскоўны аэрапорт «Шарамеццева» зачынілі праз план «Дыван». Тым часам расейскае Міністэрства абароны РФ пацвердзіла налёт 86 беспілотнікаў.

Жыхары Маскоўскай вобласці запісалі відэа з месца падзей, на якіх чуваць матор дрона падчас палёту над населеным пунктам. На адным з запісаў, апублікаваным у Telegram-канале расСМІ Mash, – выбух і выбліск у небе.

У канале расСМІ інфармацыя пра налёт з'явілася ў 2:52 9 ліпеня. Удакладнялася, што бразджанне БПЛА і выбухі раздаваліся ў двух гарадах Маскоўскай вобласці. Паводле звестак няўказаных крыніцаў у Зеленаградзе чулі тры гучныя гукі, у Сонечнагорску – два. Тым часам Расавіяцыя на некалькі гадзінаў закрыла аэрапорт «Шарамеццева», але ўжо на раніцу яго адкрылі.

Зеленаград і Сонечнагорск – населеныя пункты на паўночна-заходніх ускраінах Масквы. За 480 км – мяжа Украіны, за 15 км – аэрапорт «Шарамеццева». Варта дадаць, што Зеленаград уважаюць за галоўны навукова-вытворчы цэнтр расейскай электронікі і мікраэлектронікі.

Мэр Масквы Сяргей Сабянін у Telegram пацвердзіў атаку дронаў на РФ. Паводле словаў расейскага чыноўніка, Мінабароны нібыта збіла два беспілотнікі, якія ляцелі на сталіцу. Інфармацыя пра першае абясшкоджванне з'явілася ў сетцы ў 2:49, пра другое – у 3:01. Чыноўнік заявіў, што на месца падзення абломкаў накіраваныя экстранныя службы: звестак пра разбурэнні і параненых не паступала.

Мінабароны РФ, у сваю чаргу, раніцай 9 ліпеня заявіла пра масаваны налёт БПЛА. Установа паведаміла пра ўдар 86 дронаў, якія ўсе нібыта былі збітыя. Над Маскоўскай вобласцю абясшкодзілі чатыры беспілотнікі, з іх два – пад Масквой. Іншыя восем рэгіёнаў, над якімі працавалі сродкі СПА, – гэта вобласці Курская, Бранская, Тульская, Белгародская, Арлоўская, Смаленская, Варонежская, Разанская.