Трамп пагражаў Пуціну «разбамбіць Маскву да д'ябла»

• 9.07.2025, 18:44

CNN публікуе аўдыязапісы заяваў.

Летась Дональд Трамп на закрытай сустрэчы донараў заявіў, што аднойчы ён спрабаваў утрымаць Уладзіміра Пуціна ад нападу на Украіну. Ён пагражаў «разбамбіць Маскву да д'ябла».

Пра гэта паведамляе CNN, якая публікуе аўдыязапіс заявы.

«Я сказаў Пуціну: “Калі вы ўрываецеся ва Украіну, я разбамблю Маскву да д'ябла. Кажу вам, у мяне няма выбару”», – сказаў Трамп падчас аднаго з мерапрыемстваў для збору сродкаў у 2024 годзе.

Паводле аўдыязапісу, Пуцін адказаў, што не верыць Трампу. «Але ён паверыў мне на 10%», – расказаў Трамп.

Пазней Трамп заявіў, што перадаў аналагічнае папярэджанне старшыню КНР Сі Цзіньпіну датычна магчымага ўварвання на Тайвань, заявіўшы яму, што ў адказ ЗША будуць бамбаваць Пекін.

«Ён уважаў мяне за вар'ята», – сказаў Трамп пра Сі, а потым дадаў, што «ў нас ніколі не было праблемаў».

Заявы Трампа

Гэтыя выказванні прагучалі ў той час, калі Трамп высоўваў сваю кандыдатуру на другі тэрмін. Яны былі запісаныя на дабрачынных мерапрыемствах 2024 года ў Нью-Ёрку і Флорыдзе.

Пасля іх атрымалі Джош Доўсі, Тайлер Пэйджар і Айзек Арнсдорф, якія падрабязна апісалі некаторыя з гэтых размоваў у сваёй новай кнізе «2024». У траўні Джош Доўсі апублікаваў заяву Трампа пра пагрозы Пуціну «бамбіць Маскву» у The Washington Post. Аднак самі аўдыязапісы раней не публікавалася.