WSJ: ЗША гатовыя паставіць Украіне не толькі сістэму Patriot

• 9.07.2025, 10:15

Ужо накіраваны запыт Пентагону.

Трамп гатовы разгледзець пытанне пра перадачу Украіне яшчэ адной сістэмы Patriot. Такую заяву прэзідэнт ЗША зрабіў пасля таго, як днямі паабяцаў умацаваць абарону Украіны на фоне сталых штодзённых нападаў з боку Крамля.

Журналісты The Wall Street Journal са спасылкай на двух амерыканскіх чыноўнікаў паведамляюць, што Белы дом ужо накіраваў адпаведны запыт у Пентагон.

У яго ўваходзіць просьба не толькі пра перадачу сістэмы СПА, але і пра іншыя віды ўзбраенняў, якія могуць дапамагчы Украіне ў супрацьстаянні з войскам Пуціна.

Пры гэтым у ЗША вывучаюць пытанне, ці змогуць хаўруснікі таксама перадаць Украіне дадатковыя сістэмы Patriot.

Адзін з былых чыноўнікаў Пентагона паведаміў, што з 2022 года ЗША і Нямеччына паставілі Украіне па тры сістэмы Patriot, яшчэ адну перадаў кансорцыум еўрапейскіх краінаў.

Учора стала вядома, што Трамп распарадзіўся перадаць Украіне 10 ракетаў для сістэмы Patriot. Акрамя таго, Вашынгтон чыніць ціск на Нямеччыну, каб яна прадала Украіне яшчэ адну батарэю Patriot.