УСУ знішчылі ЗРК «Бук-М1» расейцаў за 10 мільёнаў даляраў

• 9.07.2025, 10:55

Відэафакт.

Украінскія воіны знішчылі яшчэ адзін расейскі зенітна-ракетны комплекс «Бук-М1». Кошт такой сістэмы СПА ацэньваецца прыкладна на 10 мільёнаў даляраў.

Пра гэта паведамляюць Сухапутныя войскі Украіны.

Паспяховую аперацыю правялі байцы брыгады «Чорны лес» супольна з ваярамі 413-га асобнага батальёна беспілотных сістэмаў «Рэйд». Відэа знішчэння ЗРК абнародаванае таксама на афіцыйных старонках падраздзяленняў.

Дзякуючы дакладнай працы выведкі, карэктаванню з дронаў і эфектыўнай агнявой паразе атрымалася знішчыць варожы комплекс, які прыкрываў пазіцыі расейцаў. Гэта – чарговы ўдар па сістэме супрацьпаветранай абароны ворага, які дэманструе ўразлівасць нават дарагой тэхнікі РФ перад украінскімі беспілотнікамі і артылерыяй.

Што вядома пра «Бук-М1»

«Бук-М1» – гэта зенітна-ракетны комплекс сярэдняй далёкасці, распрацаваны ў Савецкім Саюзе для паразы паветраных цэляў, такіх як самалёты, гелікаптэры, крылатыя ракеты і беспілотнікі. Ён паступіў на ўзбраенне ў 1983 годзе як мадэрнізаваная версія папярэдняга комплексу «Бук».

Сістэма здольная адначасова паражаць некалькі цэляў на вышынях ад 15 метраў да 22 кіламетраў, на адлегласці да 35 км. Дзякуючы трэкавай платформе «Бук-М1» валодае высокай мабільнасцю і можа аператыўна змяняць пазіцыю, каб унікнуць зваротных удараў.

Падчас поўнамаштабнай вайны ва Украіне расейскае войска актыўна ўжывае гэтыя комплексы для прыкрыцця сваіх пазіцый ад нападаў з паветра – як ад баявых самалётаў, так і ўдарных дронаў УСУ.