BE RU EN

У Еўрапейскім парламенце прайшлі дэбаты пра Беларусь

  • 9.07.2025, 11:05

Прагучалі два ключавыя пасылы.

Падчас пленарнай сесіі ў Страсбургу ў Еўрапейскім парламенце прайшлі дэбаты пра Беларусь, паведамляе карэспандэнт сайта Charter97.org.

8 ліпеня парламентарыі і еўрапейскія чыноўнікі абмяркоўвалі сітуацыю, якая ўзнікла пасля нядаўняга вызвалення 14 палітычных зняволеных.

У выступах і дэпутатаў, і чыноўнікаў рэфрэнам паўтараліся два ключавыя пасылы. Па-першае, нармалізацыя стасункаў паміж Брусэлем і афіцыйным Менскам немагчымая без вызвалення ўсіх палітычных зняволеных – як сказала еўрапейская камісарка ў пытаннях пашырэння Еўрапейскага Звязу Марта Кос (гэтую ж думку іншымі словамі паўтарылі многія ўдзельнікі дэбатаў): «Калі Беларусь мае намер прадэманстраваць рэальныя і доўгатэрміновыя змены, яна павінна для пачатку неадкладна і безумоўна вызваліць усіх палітычных зняволеных».

Нягледзячы на вызваленне дзясяткаў зняволеных, рэпрэсіі прадаўжаюцца. Дэпутат ад Польшчы Адам Бялян сказаў: «Вызваленне некалькіх не павінна адварочваць нас ад пакут многіх, якія прадаўжаюцца».

У эмацыйным выступе кіраўніца дэлегацыі Еўрапарламента ў сувязях з Беларуссю Малгажата Гасеўска заклікала ўзмацніць санкцыі супраць рэжыму і «ўдарыць дакладней і глыбей». Да ўзмацнення санкцый заклікаў і старшыня Камітэта замежных справаў Еўрапейскага парламента Дэвід Макалістэр.

Мірыям Лексман, еўрадэпутатка ад Славакіі, сказала: «Мы павінны прадаўжаць чыніць ціск на Лукашэнку, сярод іншага дамагаючыся таго, каб не было абыходаў нашых санкцый». Таксама славацкая заканадаўца прапанавала разглядаць сітуацыю ў Беларусі і ва Украіне супольна: «Наша падтрымка Украіны – гэта таксама падтрымка дэмакратычнай і расквітнелай Беларусі».

Польскі заканадаўца Марыюш Каміньскі падкрэсліў кантраст паміж нікчэмным маштабам асобы дыктатара і веліччу беларускага народа: «Лукашэнка – кат уласнага народа. Ён – расейская марыянетка, якая не змагла б утрымацца ва ўладзе без падтрымкі і тэрору Пуціна. Сёння сімвалам Беларусі з'яўляецца не падступная асоба Лукашэнкі. Сёння ў Беларусі ёсць сапраўдныя героі, змагары за свабоду. Успомнім Рамана Бандарэнку, забітага 5 гадоў таму на вуліцах Менска».

Парламентарый з Літвы Віцяніс Андрушкайціс нагадаў пра лідара беларускай апазіцыі Міколу Статкевіча: «Мы не ведаем, ці жывы ён», – і папрасіў у прадстаўнікоў Еўрапейскай камісіі: «Калі ласка, даведайцеся, дзе ён».

Польскі дэпутат Анджэй Халіцкі звярнуўся непасрэдна да беларусаў: «Вам, беларусы, я хачу сказаць: мы вас бачым, мы з вамі. Верце і спадзявайцеся. Бо ціск мае сэнс. Таму што вера важная для вашай ідэнтычнасці, і надзея – гэта свабодная, незалежная Беларусь. І яна такой будзе. Жыве Беларусь!»

Апошнія навіны