У кліентаў некалькіх беларускіх банкаў сталі спісвацца грошы

• 9.07.2025, 22:33

Што адбылося?

У «Беларусбанку» адбыўся тэхнічны збой, паведамляе тэлеграм-канал «Менск. Галоўнае!». Пазней высветлілася, што праблема закранула некалькі буйных банкаў.

Кліенты некалькіх банкаў заўважылі, што з іх банкаўскіх картаў былі спісаныя грошы. Супрацоўнікі кол-цэнтра «Беларусбанка» пацвердзілі, што сапраўды ўзнікла праблема, і запэўнілі, што яна будзе развязаная цягам дня.

«У сувязі з тэхнічным збоем, які адбыўся ў апаратна-праграмным комплексе 9 ліпеня, могуць мець месца адмоўныя балансы на картках ААТ "ААБ Беларусбанк", ААТ "Белаграпрамбанк" і ААТ "Белінвестбанк"», – паведамілі ў Банкаўскім працэсінгавым цэнтры.

Там удакладнілі, што вядуцца працы для ўхілення праблемы і запэўнілі, што «найбліжэйшым часам балансы на картках будуць урэгуляваныя».

У «Беларусбанку» патлумачылі, што збой звязаны з тэхнічнымі праблемамі. «Пры фармаванні разліковай інфармацыі на баку працэсінгавага цэнтра магчымае памяншэнне астатку на рахунках або ўтварэнне адмоўнай рэшты», – заявілі ў банку. Там таксама паведамілі, што найбліжэйшым часам карэктныя рэшткі на рахунках будуць адноўленыя.