Reuters: ЗША навучыліся абыходзіць забарону Кітая на пастаўку важных металаў

• 9.07.2025, 12:11

Змяненне гандлёвых плыняў адбылося праз трэція краіны.

У ЗША з Тайланда і Мексікі паступіла незвычайна вялікая колькасць сурмы – металу, які выкарыстоўваецца ў вытворчасці батарэй, мікрасхемаў і антыпірэнаў. У гэтым гандлі ўдзельнічае прынамсі адна кампанія з Кітая, хоць Пекін увёў забарону для Вашынгтона.

Выданне Reuters піша, што Кітай дамінуе ў пастаўках сурмы, а таксама галію і германію, якія выкарыстоўваюцца ў тэлекамунікацыях, паўправадніках і вайсковых тэхналогіях. Пекін забараніў экспарт гэтых мінералаў у ЗША 3 снежня 2024 года пасля таго, як Вашынгтон увёў абмежаванні на кітайскі сектар вытворчасці мікрасхемаў.

Змена гандлёвых плыняў падкрэслівае барацьбу за крытычна важныя мінералы і намаганні Кітая ва ўвядзенні абмежаванняў ва ўмовах канкурэнцыі з ЗША за эканамічную, ваенную і тэхналагічную перавагу. Сярод іншага, гандлёвыя звесткі сведчаць пра перанакіраванне паставак з ЗША праз трэція краіны.

Згодна са звесткамі мытнай службы ЗША, са снежня да красавіка Вашынгтон імпартаваў 3834 метрычныя тоны аксідаў сурмы з Тайланда і Мексікі. Гэта больш, чым за папярэднія тры гады разам узятыя.

Тым часам, паводле звестак кітайскай мытні за перыяд да траўня, Тайланд і Мексіка ўвайшлі ў тройку лідараў у экспарце кітайскай сурмы сёлета.

Паводле звестак кансалтынгавай кампаніі RFC Ambrian, у Тайландзе і Мексіцы ёсць па адным заводзе вытворчасці сурмы, прычым апошні быў ізноў адкрыты толькі ў красавіку. Ні адна з гэтых краінаў не здабывае значных аб'ёмаў гэтага металу.

Заканадаўства ЗША не забараняе амерыканскім пакупнікам набываць сурму, галій ці германій кітайскага паходжання. Кітайскія кампаніі могуць выпраўляць гэтыя мінералы ў іншыя краіны, акрамя ЗША, калі яны маюць ліцэнзію. Thai Unipet Industries, тайская даччыная кампанія кітайскага вытворцы сурмы Youngsun Chemicals, у апошнія месяцы вядзе актыўны гандаль з ЗША.